İKT REGİON

Gəncədə köhnə magistral İnternet kabellər yeni optik xətlərlə əvəz olunur.

Bu barədə Xeberler.az-a Aztelekom İB-nin  Gəncə Telekommunikasiya İdarəsinin baş mühəndisi  Etibar Nəbiyev məlumat verib.

Onun sözlərinə görə, əvvəllər  Gəncə əhalisinə İnternet 20-30 ildən qalmış magistral  xətlərlə paylanılırdı və  bu xidmətin keyfiyyəti yaxşı  olmadığı  üçün tez-tez istifadəçilər narazılıq edirdi.

Baş mühəndis bildirib ki, hazırda Gəncədə “Multimedia xidmətlərinin  inkişaf  layihəsi” ilə  magistral xətlər yeni optik xətlərlə əvəz edilir: “Layihəyə yanvar ayından etibarən başlamışıq və sentyabrda magistral xətlərin yeni optik xətlərlə əvəz edilməsi başa çatacaq. Artıq Gəncə əhalisi İnternetə qoşulmaq üçün köhnə magistral  xətlərdən istifadə etməyəcək”.

Etibar Nəbiyev qeyd edib ki, Gəncədə  mövcud 200 paylayıcı magistral xətlər olan rabitə şkafın 54-ü artıq optik rabitə şkaflarla əvəz olunub: “Bu fəaliyyət uzun zaman alır.  Rabitə şkaflarını quraşdırmaq asandır, amma magistral xətdən onları fiber optikə çevirmək  müəyyən vaxt tələb edir. Ona görə, bütün bu işlər  mərhələ-mərhələ həyata keçirilir”.

Baş mühəndis onu da vurğulayıb ki, rabitə şkaflarını quraşdıran zaman istifadəçiləri bununla bağlı məlumatlandırılır. “ Çünki köhnə rabitə şkaflardan kabeli kəsib yeni kabel quraşdıran zaman İnternet kəsilir”, deyə Etibar Nəbiyev əlavə edib.  

Qeyd edək ki, hazırda Gəncədə ümumi İnternet  istifadəçilərinin  sayı 24 min nəfərdir. AztelekomNet-in 8500 nəfər istifadəçisi var, digərləri isə özəl provayderin istifadəçiləridir. 

Gəncədə 12-yə yaxın provayder fəaliyyət göstərir. 

Məltəm Talıbzadə,

Gəncə şəhəri