TƏNZİMLƏMƏ

Bu günlərdə  rəsmən bildirilib ki, Nazirlər Kabinetinin Yol Hərəkətinin Təhlükəsizliyi Komissiyası tərəfindən tədbirlər planı qəbul edilənədək rayon qeydiyyatında olan nəqliyyat vasitələrinin, habelə yük avtomobillərinin paytaxt ərazisinə daxil olmasına qadağa tətbiq olunacaq.

Xeberler.az məsələ ilə bağlı ekspert rəyi öyrənib.  

Azərbaycan İnternet Forumunun rəhbəri  Osman Gündüz məsələyə münasibət bildirərkən qeyd edib ki, bu, yanlış qərardır və  Azərbaycanın indiki imici,  inkişaf səviyyəsinə uyğun olmayan bir yanaşmadır.

Osman Gündüz  bu məsələnin tənzimlənməsində  Nəqliyyat Əməliyyatlarını İntellektual İdarəetmə Sistemini məsul qurum hesab edir:

“Ölkədə 2007-ci ildən milyonlarla vəsait sərf olunan Nəqliyyat Əməliyyatlarını İntellektual İdarəetmə Sisteminin (NİİM) yaradıması nəzərdə tutulub. 2013-cü ildən tam olaraq fəaliyyətdə olduğu élan edilib. Amma  nədənsə intellektual tənzimləmə nəzərə çarpmır. Nə üçün tənzimləməni bu mövcud normalarla, bu intellektual sistemlə deyil, Dövlət Yol Polis İdarəsi, Bakı şəhər İH, Azəryolservis, Nəqliyyat Nazirliyi, başqa  qurumlar hansısa  “ənənəvi” metodlarla tənzimləməlidir ?”.

Ekspert vurğulayıb ki, SMS məlumatlandırma sistemi hələ də yoxdur, tıxac vəziyyətindən çıxışla bağlı mobil imkanlar yaradılmayıb, onlayn formada, mobil formada alternativlər təklif olunmur :

“Nə vaxtadək beton və ya plasmas plitələrlə, yeni-yeni yol zolaqları ilə bu fəaliyyət tənzimlənəcək ? Nə üçün NİİM qarşıya qoyduğu məqsədləri indiyədək yerinə yetirə bilməyib ?”.

Osman Gündüz hesab edir ki,  İlk Avropa Oyunları ilə bağlı tətbiq olunan  bəzi yeniliklər anlaşılan idi, çünki başqa variantlar da yox idi. Onun sözlərinə görə,  indiki halda, adi vəziyyətdə bu problemlər öz həllini tapmalıdır:

“Fikrimcə,  təcili olaraq NİİM-in effektivsizliyini analiz etmək, tənzimləmədən kənar qalmasını araşdırmaq lazımdır. Bəlkə bu sistemin idarəetməsi və texniki təminat məsələlərini daha peşəkar və uyğun qurumlara həvalə etmək  lazımdır.

Bütün yollar DİN, XDMX və NN –in videokameralarının nəzarəti altındadır. Doğurdanmı bu üç mənbədən alınan informasiyalar yollarda nəqliyyat axınını intellektual formada tənzimləmək üçün yetərli deyil”.

Osman Gündüz qeyd edib ki, bəlkə də NİİM-in idarəetməsi, istismarı və texnoloji təminatını   Rabitə və Yüksək  Texnologiyalar Nazirliyi, ASAN xidmət və ya DYP daha da effektiv yerinə yetirə bilərdi. O, Nazirlər Kabinetinin Yol Hərəkətinin Təhlükəsizliyi Komissiyasının problemin həllinə bu konteksdən yanaşmasının daha doğru ola biləcəyini vurğulayıb.

Qeyd edək ki, NİİM-in fəaliyyətini Xeberler.az daim nəzarətdə saxlayır. Bununla bağlı saytda bir çox məqalələr yerləşdirilib.

Məltəm Talıbzadə