TƏDBİRLƏR

Tədbirdə Azərbaycan İnternet Formunun Prezidenti, ekspert Osman Gündüz də iştirak edib. Ekspert bildirib: "Çıxışımda qeyd etdiyim kimi düşünürəm ki, bu sahədə bizim üzərimizə də, xüsusilə də hökumət üzərinə daha çox yük düşür.

Əlbəttə, İnternetdən, sosial mediadan sui istifadə, söyüş və böhtanlar yolverilməzdir. Düşünmürəm ki, normal təfəkkürlü kimsə bunu dəstəkləsin. Azərbaycan maraqları, dövlətçilik həmişə ilk sırada olmalıdır.

Informasiya sahəsində ölkəmizə qarşı təcavüzün qarşısını almaq üçün öncə biz özümüzdən, öz ölkəmizin daxilində dayanıqlı, etibarlı və əlçatan informasiya mühiti yaratmalıyıq. Bunun üçün hökumət səylərini artırmalıdır.

Bu problemin həlli üçün informasiya sahəsində milli maraqlarımızı müasir tələblər baxımından nəzərdən keçirib daha konseptual yanaşmalıyıq.

Dövlətə məxsus informasiya resurslarında, məsələn İTV-də plüralizm olmalıdır, internetdə alternativlik olmalı və inhisarçılıq aradan qaldırılmalı, qəzetlərə deyil İnternet meduanın -sosial medianın inkişafına dəstək verilməlidir, medianın müstəqilliyi və dayanıqlı inkişafı üçün münbit şərait yaradılmalıdır, milli informasiya resurslarımız məhkəmə qərarı olmadan, ciddi əsaslar olmadan bloklanmamalıdır, milli kontentin inkişafına dəstək verilməlidir və s.

Son zamanlar məmurların və vəzifəli şəxslərin sosial mediaya gəlişini bu istiqamətdə uğurlu addım hesab etmək olar.

Müasir dövrdə informasiya sahəsində təhdidlər və təhlükələr yeni mahiyhət kəsb edir.

Cəmiyyətlərin, insanların idarə edilməsi və seçkilərin nəticələrinin müyyən olunmasında sosial media mühüm rol oynamağa başlayıb.

Bu baxımdan düşünürəm ki, problemə daha konseprtual yanaşmalı, informasiya sahəsində müasir təhdidlər baxımından yeni təhlükəsizlik konsepsiyası hazırlamaq doğru olardı. Məhz bununla Azərbaycanı xaosa sürükləmək istəyən xarici güclərin qarşısını ala bilərik.