TƏHLÜKƏSİZLİK

Ötən gün "Yeni Musavat"ın "TV Musavat" və "Səs TV"nin Youtube kanallarına kiber hücum olub. Ondan öncə "Toplum TV" də kiberhücuma məruz qalmışdı.

Ümumiyyətlə, statistikaya nəzər salanda görmək olar ki, son zamanlar milli resurslarımıza qarşı bu tip kiberhücumlar xeyli artıb.

"Amma biz müvafiq dövlət qurumlarından adekvat addımlar müşahidə etmirik.Aidiyyatı qurumlar gərək kiberhücumdan öncə, profilaktiki işləri, kibertəhlükəsizliklə bağlı zəruri addımları atsınlar".

Bunu Xeberler.az-a məsələni şərh edərkən Azərbaycan İnternet Forumunun Prezidenti, ekspert Osman Gündüz deyib.

O xatırladıb ki, qeyri-dövlət sektorunda məhz bu tip məsələlərə cavabdeh qurum Rəqəmsal İnkişaf və Nəqliyat Nazirliyi Elektron Təhlükəsizlik Xidmətidir. 

Ekspert vurğulayıb ki, onun qlobal resursların administrasiyası ilə əlaqələri güclü olmalıdır, baş verənlərə anında reaksiyalar verilməlidir:

"Eyni zamanda, düşünürəm ki, MEDİA dövlət qurumu da bu məsələlərə, bu sahədə kadrların peşəkarlığının artırılmasına, redaksiyaların kibertəhlükəsizliklə bağlı potensialının gücləndirilməsinə diqqət yetirməlidir. Yeri gəlmişkən, gərək informasiya resurslarının sahibləri, media sahibləri də informasiya təhlükəsizliyi məsələlərinə diqqəti artırsınlar. Bu sahəyə investisiya yatırsınlar, peşəkar mütəxəssisləri dəvət etsinlər, komanda üçün vaxtaşırı peşəkarları dəvət edərək təlimlər təşkil etsinlər. Dünyanın gedişatı elədir ki, kibertəhdidlər, hücumlar olacaq və müşahidələr göstərir, elə bizim Xüsusi Rabitə və İnformasiya Təhlükəsizliyi Dövlət Xidmətinin hesabatından görsənirdi ki, bu tip hücümlar getdikcə artacaq. Beləliklə, bu yuxarıdakı qeydlər əsasən profilaktika ilə, cinayət baş verməzdən öncə atılacaq addımlarla bağlı idi".

Osman Gündüz əlavə edib ki, əgər milli resurslara qarşı artıq kibercinayət baş veribsə onda gərək digər müvafiq dövlət qurumları anında buna reaksiya verməlidirlər:

"Bununla bağlı qanunvericilikdə, qoşulduğumuz beynəlxalq konvensiyada yetərincə müddəalar nəzərdə tutulub. Rəsmi açıqlamalar olmalıdır. Amma bunlar müşahidə olunmur. Ölkənin informasiya təhlükəsizliyi üçün mühüm əhəmiyyət kəsb edən milli informasiya resurslarımıza qarşı bu cür sayğısızlıq yolverilməzdir. Milli informasiya resurslarına adi bir "sayt", "veb səhifə", adi bir sosial resurs kimi yanaşmaq heç bir halda doğru deyil. Uzun illər boyu formalaşan, nəhəng informasiya ehtiyatına malik olan, yüz minlərlə auditoriyası olan, informasiya azadlığının reallaşmasına kömək edən, ictimai fikrin formalaşmasına təsir edən bu informasiya resursları dövlət üçün çox mühüm əhəmiyyət kəsb edir".

Ekspert hesab edir ki, yüz minlərlə ziyarətçisi olan bir milli Youtube kanalının bir anda yoxa çıxması informasiya sahəsində milli maraqlarımız üçün ciddi təhdid olaraq dəyərləndirlməlidir:

"İnformasiya sahəsində milli maraqlarımız tələb edir ki, informasiya azadlığının reallaşması üçün bu resurslar daim dayanıqlı olmalı, əlçatan olmalı və təhlükəsizliyi təmin edilməlidir. Ümid edirəm ETX, DTX, DİN, CERT və digər qurumlar milli informasiya resurslarının təhlükəsizliyinin qorunması sahəsində səylərini gücləndirəcəklər".