İNNOVASİYA VƏ STARTAP

Fevralın 1-dən “Startup Azərbaycan 2015” Müsabiqəsinə start verilib.

Müsabiqə üçün artıq 24 startap layihəsi qeydiyyatdan keçib.

Xəbərlər indiyədək qeydiyyatdan keçən layihələrin bölmələr üzrə sayını təqdim edir:

Belə ki, müsabiqəyə mobil istiqamət üzrə üç layihə, GoMap mobil tətbiqləri üçn bir layihə, e-gov mobil tətbiqləri üçün iki layihə qeydiyyatdan keçib. 
Bununla yanaşı, e-ticarət nominasiyası üçün üç layihə, oyunlar üçün bir, sosial servislər üçün 7 layihə qeydiyyata alınıb. 
7 layihə isə digərlər bölməsinə müraciət edib. 

“Startup Azərbaycan 2015” Müsabiqəsi ənənəvi Startup Azərbaycan Layihəsi çərçivəsində keçirilir.

Bu il ilk dəfə olaraq Elektron Hökumət Portalı və SİNAM şirkətinin GoMap resursu üzərində hazırlanan mobil tətbiqlər də xüsusi Nominasiya üzrə Startup Azərbaycan 2015 müsabiqəsinə qatılacaqlar. 

Startup layihələrin qeydiyyat müddəti mart ayının sonunadək davam edəcək. Layihələr www.startup.az resursunda qeydiyyata alınır. Layihələrlə bərabər investorlar, mentorlar , developerlər və İT mütəxəssislər də bu resursda qeydiyyatdan keçə bilərlər. Müsabiqəyə təqdim edilən Layihələrin qiymətləndirilməsi 2 mərhələdə həyata keçirilir.

Qaliblərin adları may ayında keçirilməsi nəzərdə tutulan ənənəvi Startap Azərbaycan təqdimat mərasimində açıqlanacaq.
Qaliblər qiymətli hədiyyələr və diplomlarla mükafatlandırılacaq, onların investorlarla görüşü təşkil olunacaq. Qalib startuplar Yüksək Texnologiyalar Parkında iş şəraiti ilə təmin olunacaqlar.

Yeni Nominasiyalar üzrə təqdim edilən və qalib gələn Mobil tətbiqlər isə əlavə olaraq xüsusi mükafatlar da alacaqlar.

Startup Azərbaycan Layihəsinə Rabitə və Yüksək Texnologiyalar Nazirliyi yanında İT-nin İnkişafı Dövlət Fondu, Elektron Hökumət Portalının operatoru olan MHM və Yüksək Texnologiyalar Parkı dəstək verir. 

Startup Azərbaycan-ın Akademik partnyoru ADA Universitetidir. 
İnfiPro, SİNAM , SMART Systems, Cybernet və Happy Baku şirkətləri Startup Azərbaycan-a dəstək verirlər. 

Məltəm Talıbzadə