E - HÖKUMƏT

 Bu gün Azərbaycan Dövlət İqtisad Universitetində (ADİU) “Elektron sənəd dövriyyəsinin tətbiqi” nin təqdimatı keçirilib.

Xeberler.az-ın məlumatına görə, tədbirdə ADİU-nun rektoru, professor Ədalət Muradov , Multimedia Mərkəzinin rəhbəri Osman Gündüz, həmçinin ali təhsil müəssisələrinin rəhbərləri və təhsil müəssisələrinin nümayəndələri də iştirak edib.

Tədbirdə ADİU-nun rektoru, professor Ədalət Muradov çıxış edərək Universitetdə İKT-nin tətbiqinin, xüsusilə də cəmi bir ay öncə tətbiq edilməyə başlanan Elektron sənəd dövriyyəsinin qənaətçillik, çeviklik və şəffaflıq baxımından xeyli faydalı olduğunu diqqətə çatdırıb.

O , digər Universitetlərə də bu istiqamətdə köməklik göstərməyə hazır olduqlarını bildirib.

Mərasimdə Ultra şirkətinin nümayəndələri Anar Məmmədov və Rövşən Ağakərimov elektron sənəd dövriyyəsinin fəaliyyət istiqamətləri barədə iştirakçılara geniş təqdimat ediblər.

 Hazırlanan sistemin Azərbaycan Respublikası Prezidentinin 2003-cü il 27 sentyabr tarixli 935 nömrəli Fərmanı ilə təsdiq edilmiş “Dövlət hakimiyyəti orqanlarında, idarə, təşkilat və müəssisələrində kargüzarlığın aparılmasına dair Təlimat”a tam uyğunlaşdırıldığı bildirilib.

İştirakçılara məlumat verilib ki, sistem üzərindən yür kürəsinin istənilən yerində sənədə icazə almaq, imzalamaq və ya gözdən keçirmək mümkündür.

Ultra şirkətinin təqdimatında qeyd edilib ki, mobil cihazlarda sistemdən istifadə edərkən səyahətdə , ezamiyyətdə,  iclasda və işdən kənarda olduqda sənədlərlə bağlı bütün işləri icra etmək mümkündür. Bildirilib ki, sistem Azərbaycan və rus dilində işləyir, xüsusi “CPen” qələm skaynerdən istifadə etməklə kağızda mövcud olan mətnləri skan etmək, bütün rəsmi sənədlərin elektron bazasını və bu sənədlərin elektron arxiv modulunda təhlükəsiz saxlamaq imkanı yaradır.

Təqdimatçılar sistemin hazırlanmasında və istifadəsində Oracle, DELPHİ və Java texnologiyalarından, BULUD platformasından, həmçinin Microsoft ,HP və Cisco avadanlıqları və proqram təminatlarından istifadə edildiyini diqqətə çatdırıblar.

 Təqdimatdan sonra Ultra şirkətinin nümayəndələri təhsil müəssisələrinin məsul şəxslərinin və ekspertlərin suallarını cavablandırıblar.

Ultra şirkətinin adı çəkilən sistemi artıq Təhsil Nazirliyinin Təhsil Sisteminin İnformasyalaşdırılması İdarəsində, RYTN-nin Beynəlxalq Əlaqələr və Hesablaşmalar Mərkəzində, İqtisadiyyat və Sənaye Nazirliyində, Maliyyə Nazirliyində, Heydər Əliyev Fondunda tətbiq edilməkdədir.

Məltəm Talıbzadə