PROQRAMLAR

Wi-Fi simsiz şəbəkələri üçün 802.11n standartı təsdiq olunub. Yeni standart maksimal məlumat ötürülmə sürətini təxminən on dəfə artırır. Onun xüsusiyyətləri 2009-cu ilin sentyabr ayının 11-də IEEE (Institute of Electrical and Electronics Engineers) beynəlxalq təşkilatının Standartlar üzrə Şurası tərəfindən qəbul olunub. 802.11n standartlı simsiz şəbəkədə fiziki səviyyədə maksimal məlumat ötürülmə sürəti saniyədə 600 meqabit təşkil edir. Təcrübədə bu saniyədə 150-200 meqabit deməkdir.

Wi-Fi standartının əvvəlki versiyasında (802.11g) maksimal sürət göstəricisi saniyədə 54 meqabit, real olaraq isə saniyədə 20 meqabit təşkil edir. 7 il ərzində işlənib hazırlanan 802.11n standartının 2007-ci ildə 802.11n Draft 2.0 – “qaralama” versiyası təsdiq olunmuşdur. Son varianta bu versiya ilə müqayisədə yalnız elə də vacib olmayan əlavələr daxil edilib. Belə vəziyyətdə, son iki il ərzində istifadəyə verilmiş “draft n” işarəli qurğular final versiya ilə tam uyğunluq təşkil edəcək. Yeni avadanlıq həmçinin 802.11a/b/g əvvəlki nəsil qurğularla da işləyə bilər. Yüksək sürət çoxaxınlı məlumat ötürülmə texnologiyası hesabına əldə olunur (MIMO - multiple-input multiple-output).

Qəbuledici və verici qurğular bir neçə antenalarla təchiz olunurlar. 802.11n simsiz şəbəkəsi iki tezlik diapazonunda işləyə bilir və əvvəlki versiya ilə müqayisədə daha geniş qəbuledici zona ilə təmin edir. Wi-Fi Alliance təşkilatı avadanlığın yeni standart üzrə sertifikatlaşdırılmasına sentyabrın 30-dan başlayacaq. Bundan əlavə saniyədə 450 meqabit məlumat ötürülmə sürətini dəstəkləyən qurğuların test işləri aparılacaq. 802.11n standartının tam xüsusiyyətlərinin oktyabr ayının ortasında açıqlanacağı gözlənilir.