PROQRAMLAR

AMEA-nın vitse-prezidenti, Elm və Təhsil Nazirliyinin İnformasiya Texnologiyaları İnstitutunun baş direktoru, akademik Rasim Əliquliyev Azərbaycan Texniki Universitetinin (AzTU) 75 illik yubileyinə həsr olunmuş tədbirdə çıxış edib.

Xeberler.az bildirir ki, Akademik çıxışının əvvəlində Azərbaycan elmi ictimaiyyəti adından universitetin rəhbərliyini, professor-müəllim heyətini, məzunları və tələbələri salamlayaraq AzTU-nun 75 illiyi münasibətilə təbrik edib, bu əlamətdar yubiley tədbirində iştirak etməkdən məmnunluğunu ifadə edib.

AMEA-nın vitse-prezidenti bildirib ki, Azərbaycan Texniki Universiteti yarandığı gündən etibarən şərəfli və zəngin inkişaf yolu keçib. Qeyd olunub ki, həm Sovet İttifaqı dövründə, həm də müstəqillik illərində universitetin əsas missiyası dövlətə və cəmiyyətə xidmət etmək, sənayenin müxtəlif sahələri üçün yüksəkixtisaslı mühəndis kadrları hazırlamaq olub.

Akademik Rasim Əliquliyev AzTU-nun 75 il ərzində iki mühüm intibah mərhələsindən keçdiyini vurğulayıb. Bildirib ki, Ulu Öndər Heydər Əliyevin hakimiyyətə gəlişindən sonra ölkədə sənaye cəmiyyətinin formalaşdırılması istiqamətində ardıcıl tədbirlər həyata keçirilib, Bakı Məişət Kondisionerləri Zavodu, “Radiozavod”, Elektron Hesablama Maşınları Zavodu, “Ulduz” Zavodu və digər istehsal müəssisələrinin yaradılması yeni texnoloji mərhələnin əsasını qoyub. Bu proseslər sənayenin tələblərinə cavab verən yüksəkixtisaslı mühəndis və texniki kadrların hazırlanmasını zəruri edib və həmin dövrdə AzTU ölkənin aparıcı texniki ali təhsil müəssisələrindən birinə çevrilib.

Alim qeyd edib ki, Ümummilli Lider Heydər Əliyevin ikinci dəfə hakimiyyətə qayıdışından sonra ölkədə sabitlik təmin olunub, Azərbaycan vətəndaş müharibəsi təhlükəsindən xilas edilib. Onun sözlərinə görə, qlobal texnoloji proseslərə uyğun olaraq 2003-cü ildə “Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiya”nın qəbul edilməsi AzTU-nun kompüter mühəndisliyi, telekommunikasiya, peyk rabitəsi və digər yüksək texnologiyalar sahəsində kadr hazırlığında mövqelərini daha da gücləndirib. Bu mərhələ universitetin ikinci intibah dövrü kimi dəyərləndirilib.

Akademik Rasim Əliquliyev Prezident İlham Əliyevin rəhbərliyi ilə ölkədə suverenliyin möhkəmləndirilməsi, qlobal çağırışlara adekvat inkişaf strategiyalarının icrası, rəqəmsal transformasiya və süni intellektin inkişafının əmək bazarında mühəndis peşəsinə marağı artırdığını vurğulayıb. Bildirilib ki, dövlət idarəçiliyində və müxtəlif sahələrdə müasir texnologiyaların geniş tətbiqi mühəndislər qarşısında yeni vəzifə və məsuliyyətlər yaradır.

Çıxışda Prezident İlham Əliyevin AMEA-nın 80 illik yubiley tədbirində və son illərdə qəbul olunmuş strateji sənədlərdə süni intellekt, rəqəmsal texnologiyalar və kibertəhlükəsizlik sahəsində kadr hazırlığının vacibliyini xüsusi olaraq önə çəkdiyi qeyd edilib.

Sonda akademik Rasim Əliquliyev Azərbaycan Texniki Universitetində beynəlxalq əməkdaşlığın genişləndirilməsi, ixtisaslaşmış mərkəzlərin yaradılması və strateji layihələrin icrası istiqamətində görülən işləri yüksək qiymətləndirib.