“B.EST Solutions” şirkəti Estoniyada keçirilən İKT həftəsində

13-05-2015 / 22:12

Bu həftə Estoniyanın paytaxtı Tallinn şəhərində ilin ən böyük informasiya-kommunikasiya (İKT) tədbiri olan ənənəvi “Estonian ICT Week 2015” keçirilir.

Tədbir çərçivəsində İKT sahəsində çalışan dünyanın müxtəlif yerlərindən olan ekspertlər, dövlət və özəl sektor nümayəndələri fikir mübadiləsi və yeni əlaqələrin yaradılması, eləcə də hökumət və özəl sektorda İKT sahəsində əldə edilmiş ən son nailiyyətlərlə tanış olmaq imkanı əldə edirlər.

Tədbirdə Azərbaycandan geniş nümayəndə heyəti təmsil olunur.

Konfransda iştirak edən "B.EST Solutions" şirkətinin təsisçisi xanım Yana Krimpe "Vətəndaşlara və özəl sektora innovativ xidmətlərin göstərilməsi üzrə ən yaxşı təcrübələr" mövzusunda plenar sessiyada çıxış edərək rəhbərlik etdiyi şirkətin elektron idarəetmə və elektron xidmətlər sahəsi üçün təqdim etdiyi qabaqcıl texnoloji həllərdən söz açıb. O, həmçinin "B.EST Solutions" tərəfindən tətbiq edilən "Asan İmza" mobil elektron imza texnologiyasından danışaraq, şirkətin yaxın gələcəkdə istismara verəcəyi digər innovativ layihələr barədə məlumat verib.

Ümumilikdə, mayın 12-13-də keçirilmiş konfrans çərçivəsində elektron xidmətlərin gələcəyi, Şərq Tərəfdaşlığı ölkələrində elektron idarəetmə modelləri, elektron hökumət kontekstində kibertəhlükəsizlik, şəhərlərdə elektron parkinq infrastrukturunun yaradılması və s. mövzuları əhatə edən altı seminar təşkil edilib. Azərbaycanın öncül “ASAN xidmət” konsepsiyasının və yüksək texnoloji mobil imza xidməti olan “Asan İmza”nın tətbiqi sahəsində təcrübəsi innovativ xidmətlərin yaradılması sahəsində ən yaxşı beynəlxalq təcrübələr sırasında qeyd edilib.

Konfrans ərzində tədbirin təşkilatçıları tərəfindən həmçinin “Azərbaycan – vətəndaşlar üçün effektiv elektron idarəetməni inkişaf etdirərək” adlı informasiya bukleti və “Azərbaycanın ən yaxşı təcrübəsi” adlı veb-resurs (www.azerbaijanbestpractice.com) da iştirakçılara təqdim edilib.

Bu məlumat vasitələrində Azərbaycanda elektron hökumət sahəsində həyata keçirilən islahatlara, vətəndaşlara göstərilən sosialyönümlü xidmətlərə və kibertəhlükəsizlik məsələlərinə dair icmallar və elektron idarəetmə və İKT sahəsi üzrə ölkənin sahib olduğu göstəriciləri əks etdirən məlumatlar əksini tapıb.

Azərbaycanda “ASAN xidmət” şəbəkəsi formatında tətbiq edilmiş innovativ sosial xidmətlərin göstərilməsi modeli tədbirin təşkilatçıları tərəfindən yüksək qiymətləndirilib və Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi effektiv elektron idarəetmənin inkişafına görə mükafatla təltif edilib.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.