"Bəzi universitetlər qeydiyyat üçün "Kəndirli qovluq", notarial təsdiqlər, DİM-dən arayış, yaşayış yerindən arayış, qonşudan arayış və s. tələb edir. Elm və Təhsil Nazirliyi isə tələbələrdən universitetlərə qeydiyyat üçün heç bir sənədin tələb olunmadığı qeyd edib. Bu dərəcədə olacağını gözləmirdim".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Qeyd edək ki, İnnovasiya və Rəqəmsal İnkişaf Agentliyi və Elm və Təhsil Nazirliyi bir neçə ay öncədən elan ediblər ki, universitetlərə qəbul olunanlardan kağız sənədlər toplanmayacaq, paralel qediyyatlar aparılmayacaq, qeydiyyat yalnız
portal.edu.az üzərindən aparılacaq.
Elm və Təhsil Nazirliyi elan edib ki, portalda qeydiyyat üçün tələbələrdən heç bir sənəd tələb olunmur.
Osman Gündüz əlavə olaraq qeyd edib ki, tələbə sistemə daxil olan zaman özünün bütün sənədlərini (attestat, yaşayış yeri, DİM məlumatları, hərbi şağırışla bağlı məlumatlar, güzəşt hüququ verən sənədlər və s.) sistemdə görür və onları sadəcə təsdiqləyir. Bir daha təkrar edirik ki, tələbə heç bir sənədi sistemə yükləmir!
"Elm və Təhsil Nazirliyi universitetlərə də bu sənədlərə giriş imkanı yaradıb. Yəni Universitetə tələbənin attestatı və.s başqa hansısa bir sənəd lazımdırsa, universitet öz giriş məlumatları ilə ETN sisteminə daxil olub onu görə bilir. Bundan artıq nə olmalıydı. Yəni əsil rəqəmsal hökumət komponentləri bu qeydiyyat prosesində qurulub".
Lakin görünən odur ki real vəziyyət tamam başqadır.
Ekspert bildirib ki, ötən gündən başlayaraq biz bu prosesi monitorinq edirik.
Monitorinqin bəzi nəticələri çox düşündürücüdür və çox təəssüf doğurur.
Universitetlərin elanlarından görünür ki, yenə də portal.edu.az-dan kənar, paralel qeydiyyat aparanlar, kağız sənədlər tələb edənlər var:
1. BDU - heç bir sənəd və paralel qeydiyyat tələb etmir.
2. AzTU - heç bir sənəd və paralel qeydiyyat tələb etmir.
3. Bakı Mühəndislik Universiteti - özü üçün kağız formada əlavə sənədlər tələb edir.
4. Gəncə Dövlət Universiteti- özü üçün "Kəndirli qovluq" və digər çoxsaylı sənədlər istəyir.
5. Azərbaycan Tibb Universiteti - əlavə çoxsaylı kağız sənədlər tələb edir.
6. ADPU - əlavə kağız sənədlər tələb edir.
Osman Gündüz ümid edir ki, İnnovasiya və Rəqəmsal İnkişaf Agentliyi və Elm və Təhsil Nazirliyi da bunlardan xəbərdardır. Güman ki hökumət fərqindədir ki, dövlətin ayırdığı bu qədər resurslar "Kəndirli qovluq" dövrünə qayıtmaq üçün nəzərdə tutulmayıb:
"Anlamıram ki, bu tip absurd və qanuna zidd, tələbələrdə və valideynlərdə çaşqınlıq və narazılıq yaradan, hökumətin apardığı siyasətə sayğısızlıq nümayiş etdirən bu tip elanlarla universitetlər nə demək istəyirlər".
"İnanıram ki İnnovasiya və Rəqəmsal İnkişaf Agentliyi və Elm və Təhsil Nazirliyi tez bir zamanda universitetlərə xəbərdarlıq edəcək və bu tip elanlar hər yerdən yığışdırılacaq" - deyə ekspert sonda bildirib.
