Bildiyiniz kimi, bu il ilk dəfə olaraq Ali təhsil müəssisələrinə qeydiyyat portal.edu.az üzərindən həyata keçirilib. Buna baxmayaraq bəzi universitetlər ənənəvi qaydada tələbələrdən sənəd tələb edirdi.
Məsələyə Azərbaycan İnternet Formunun Prezidenti, ekspert Osman Gündüz dəfələrlə münasibət bildirmişdi.
Ekspert qeyd etmişdi ki, bununla bağlı Ali təhsil müəssisələrində tələbələrin qeydiyyatı ilə bağlı monitorinqlər aparılır.
Xeberler.az bildirir ki, monitorinqlərin yekun nəticələri açıqlanıb.
Osman Gündüzün sözlərinə görə, bu il ilk dəfə olaraq çox sayda universitetlər tələbələrin qeydiyyatında kağız sənədlər toplamaqdan və paralel qeydiyyatdan imtina ediblər. Universitetlərin hamısının Elm və Təhsil Nazirliyindəki (ETN) bütün zəruri dataya giriş imkanı yaradılıb, ETN hətta öz daxili rəqəmsal sistemi olanlar üçün APİ servislər hazırlayır.
Ekspert qeyd edib ki, tələbələrin 99% -i heç bir sənəd yükləmədən
portal.edu.az sistemində qeydiyyatdan keçiblər:
"Az sayda universitetlər, xüsusilə də regionlardakı universitetlər bu il də tələbələrdən qeydiyyat üçün kütləvi formada kağız sənədlər toplamaqda davam ediblər".
Osman Gündüzün sözlərinə görə, hətta "İkili diplom"lara iddialı olan, rəqəmsal səviyyəsi yetərli inkişaf edən universitetlərin də bəziləri qeydiyyat üçün tələbələrdən kütləvi formada kağız sənədlər toplayıb.
Qeyd edək ki, universitetlərin kağız formada topladıqları sənədlərin (attestat, yaşayış yeri arayışı, sağlamlıq arayışı, güzəştlərlə bağlı notarial sənədlər, şəkillər, hərbi qeydiyyat, şəxsiyyət vəsiqəsinin surətləri, DİM-dən arayışlar və s) hamısı ETN –nin və digər qurumların bazasında rəqəmsal formada olub.
Ekspert bildirib ki, Portal.edu.az rəqəmsal platformasının kütləvi müraciətlərə dayanıqlı reaksiya verməsi, aidiyyatı dövlət qurumları ilə inteqrasiyaların yüksək səviyyədə işləməsi, kütləvi xarakterli xidmətin qüsursuz olaraq rəqəmsal formada reallaşdırılması istiqamətində ETN və İnnovasiya və Rəqəmsal İnkişaf Agentliyinin (İRİA) səyləri təqdirəlayiq olub.
Osman Gündüz düşünür ki, ETN tərəfindən, yaxud yuxarıda adı çəkilən hər iki qurum tərəfindən kağız formada sənəd toplayan universitetlərə bunun qadağan edilməsilə bağlı rəsmi müraciət göndərilməlidir ki, ali təhsil müəssisələrinin bütün pillələrinə qəbul olunanların qeydiyyatı yalnız rəqəmsal formada,
portal.edu.az üzərindən olacaq.
Sonda ekspert qeyd edib ki, gələn ildən qanunvericiliyə görə attestat və diplomların da rəqəmsal formaya keçirilməsi gözlənilir.
