Bildiyiniz kimi bir müddət öncə Elm və Təhsil Nazirliyi (ETN) və İnnovasiya və Rəqəmsal İnkişaf Agentliyi (İRİA) cari dərs ilindən başlayaraq tələbə qeydiyyatının yalnız
portal.edu.az üzərindən aparılacağını, heç bir paralel qeydiyyatın olmayacağını və kağız formada sənəd toplanmasına ehtiyac olmadığını bildiriblər.
Bundan əvvəl isə AzTU paralel qeydiyyatdan və kağız sənədlərin qəbulundan imtina etdiyini bildirmişdi.
Görəsən hansı universitetlər tələbələrin qeydiyyatı üçün kağız formada sənədlər toplayır və paralel qeydiyyat aparır?
Azərbaycan İnternet Formunun Prezidenti, ekspert Osman Gündüz bildirib ki, bununla bağlı monitorinq keçirilib.
Osman Gündüzün sözlərinə görə, monitorinq prosesində son bir həftə ərzində xeyli sayda universitetlərin sosial media resursları və rəsmi internet resursları üzərindən qeydiyyatla bağlı paylaşdıqları elanlar araşıdrılıb:
"Müsbət haldır ki, çox sayda universitetlər elanlarında qeydiyyatın yalnız
portal.edu.az platforması üzərindən olacağını qeyd ediblər".
Ekspert bildirib ki, buna baxmayaraq bəzi universitetlər paralel qaydada universitetin özündə qeydiyyat aparılacağını, bununla bağlı zəruri olan sənədlərin (attestat, yaşayış yeri arayışı, sağlamlıq arayışı, güzəştlərlə bağlı notarial sənədlər, şəkillər, hərbi qeydiyyat, şəxsiyyət vəsiqəsinin surətləri, DİM-dən arayışlar və s) kağız formalarını və surətlərini də tələb ediblər.
"Bu sənədlərin hamısı isə ETN və İRİA tərəfindən, həmçinin digər əlaqəli dövlət qurumları tərəfindən aparılan işlərin nəticəsində artıq portala rəqəmsal formada yerləşdirilib və tələbələri gözləyir".
Osman Gündüzün sözlərinə görə, bəzi universitetlər isə ümumiyyətlə qeydiyyatla bağlı elanı səhv yazaraq, tələbələri bir çox sənədləri
portal.edu.az -a yükləməyə çağırış ediblər:
"Hansı ki tələbə portala heç bir sənəd yükləmir, portala daxil olarkən bütün vacib sənədlər rəqəmsal formada tələbənin qarşısına çıxır və sadəcə onları təsdiqləyir".
Beləliklə, tələbələrin universitetlərə qeydiyyatı ilə bağlı vəziyyəti təqdim edirik.
1. Qeydiyyatı yalnız onlayn olaraq
portal.edu.az –da aparan, heç bir kağız sənəd tələb etməyən və paralel qeydiyyat aparmayan universitetlər bunlardır: BDU, AzTU, Qarabağ Universiteti, Türkiyə-Azərbaycan Universiteti, MDU, AzMİU, NDU, Odlar Yurdu, Bakı Avrasiya Universiteti, ADAU, BSU, ADNSU, Xəzər Universiteti
2. Paralel qeydiyyat aparanlar, kağız formada sənədlər toplayan universitetlər isə bunlardır: BMU, GDU (Kəndirli qovluqla birgə), ATU, ADPU, LDU (İpli qovluqla birgə), BANM, ADU, Bakı Biznes Universiteti, Azərbaycan Universiteti, Azərbaycan Texnologiya Universiteti
