AZNET

Hollandiyada yaşayan həmyerlimiz Bəhruz Məmmədovun layihəsi 2.5 milyon avro məbləğində qiymətləndirilib.

Xeberler.az bildirir ki, Diaspor Jurnalistlər Birliyindən verilən məlumata görə, bu günlərdə Bəhruz Məmmədovun həmtəsisçisi və əsas səhmdarlarından olduğu Eurekite  şirkəti ABŞ-ın Cottonwood investisiya şirkəti tərəfindən 2.5 milyon avro qiymətləndirmədə 1 milyon avro investisiya barəsində müqavilə imzalayıb. 

 Bəhruz Məmmədov gənc yaşında bu uğura imza atmasını belə izah edib: “Eurekite şirkəti Niderlandda yerləşir və Avropanın ən böyük nanotexnologiya institutu olan Mesa+ Nanotexnologiyalar İnstitutunun törəmə şirkətdir. Şirkətin əsas istiqaməti nanomaterial əsasında yeni tip elektron cihazlar hazırlamaqdır. Şirkət öz texnologiyalarından istifadə edərək yeni tip temperatura davamlı sensorların və millimetr dalğa uzunluğunda işləyən radar texnologiyalarının inkişaf etdirilməsi ilə məşğuldur. Bir çox şirkət verdiyimiz ideyalar və şirkətimiz haqqında maraqlanıb.
Bir neçə şirkət öz investisiyalarını təklif etsə də, sonda Cottonwood-la anlaşdıq. Cottonwood  investisiya şirkəti tərəfindən qoyulan sərmayə şirkətin beynəlxalq səviyyədə partnyorlar tapmasına və tez bir zamanda məhsulun beynəlxalq bazara çıxmasına zəmin yaradacaq.
İlkin razılaşmaya əsasən bir ildən sonra 10-20 milyon avro arası 2-ci mərhələ investisiyanın olması gözlənilir. Nanotexnologiya Azərbaycanda inkişaf etməyib, amma çalışacağam ki, şirkət daha da güclənəndən sonra Azərbaycana da öz töhfəmi verim”.

Qeyd edək ki, Bəhruz Məmmədov 1987-ci ildə Bakı şəhərində anadan olub. 2004-cü ildə Gəncə Dövlət Universitetinin Kimya fakültəsinə qəbul olub. Karyerasına Buxar şirkətlər qrupunda kimyaçı vəzifəsində başlayıb. 2009-cu ildə Azərbaycan Beynəlxalq Mədən Əməliyyat şirkətində kimyaçı kimi çalışıb.
Qısa müddətdə Əməliyyat işləri üzrə mühəndis və istehsalat işləri aparıcı mühəndis vəzifəsinə yüksəlib. 2012-ci ildə Niderland Krallığının Twente Universitetində Kimya mühəndisliyi fakültəsində magistr təhsilinə başlayıb.
2014-cü ildə dünyanın ən böyük kimya şirkəti olan BASF-da nanokatalizatorların sintezi üzrə mühəndis köməkçisi vəzifəsində çalışıb.
2014-cü ilin oktyabr ayında həmtəsisçi olaraq Eurekite şirkətinin əsasını qoyub. O, hazırda Eurikte şirkətinin əsas səhmdarlarından biri olmaqla yanaşı, maliyyə və əməliyyat işləri üzrə direktor vəzifəsində çalışır.

Bəhruz Məmmədov ilk azərbaycanlı gəncdir ki, nanotexnologiya sahəsində beynəlxalq şirkətin əsasını qoyub. Diaspor Jurnalistlər Birliyinin (DJB) İdarə Heyətinin üzvü olan B.Məmmədov Azərbaycanla bağlı keçirilən beynəlxalq tədbirlərdə də ölkəmizi uğurla təmsil edir.

Xeberler.az