RİNN-in İnformasiya Kommunikasiya Texnologiyaları Agentliyi sorğu keçirməyə hazırlaşır. Məqsəd internet xidmətlərinin keyfiyyətini və vətəndaş məmnuniyyətini ölçməkdir.
Çox faydalı bir addımdır.
Amma burada ciddi bir problem var. Nəticələr qəbuledilən və ağlabatan olacaqmı ?
Məlumdur ki, İKTA müstəqil deyil.
RİNN tabeliyində fəaliyyət göstərir. RİNN-in nəzarətində isə nəhəng bir internet infrastruktur, bir neçə dövlət provayderi var. Hər gün də GPON infrasturkturu inkişaf edir, milyonlarla yeni istifadəçilər Aztelekom, Baktelekom və Azeurotel dövlət provayderlərinə qoşulublar.
Artıq internet bazarında dövlətin xüsusi payının nə qədər olması haqqında heç bizim özümüzdə dəqiq bir rəqəmlər yoxdur və bütün bunlar düşündürücüdür.
Belə olan halda isə sorğunun yalnız İKTA tərəfindən keçirilməsi ədalətli və doğru olmazdı.
Sorğunun nəticələrinin güvənli, şəffaf və inandırıcı olması üçün İKTA heç olmasa vətəndaş cəmiyyətini, medianı, ictimai qurumları, İctimai Şuranı bu prosesə qoşmalıdır.
Sorğunun nəticələrinin hesablanması prosesində şəffaflıq, maraqlı tərəflərin iştirakı təmin edilməlidir.
Nəticələrin ağlabatan olması üçün bu addımların atılması məntiqli və doğru olardı.
Eyni zamanda, bildiyim qədər İKTA daha bir faydalı addım atmağa hazırlaşır.
Güman ki bu yaxınlarda İKTA “E-Şikayət” sistemi vasiitəsilə toplanmış data əsasında ən çox şikayət olunan provayderlərin də reytinqini açıqlayacaq. Bazarda hökmranlıq edən isə həm də dövlət provayderləridir. Bu siyahıda dövlət provayderləri də olacaqmı ?
Düşünürəm ki "provayderlərin şikayət reytinqi" çox maraqlı və ictimai əhəmiyyət kəsb edən bir siyahı olacaq.
Bununla bağlı biz də təkliflər təqdim etmişik.
Bu reytinqin də qəbuledilən və ağlabatan olması üçün şəffaflığın təmin edilməsi, prosesə vətəndaş cəmiyyətinin cəlb edilməsi, öncədən İKTA əlində toplanan data ilə proses iştirakçılarının tanışlığının təmin edilməsi çox vacibdir.
Osman Gündüz
