RƏQƏMSAL DÜNYA

İnformasiya Kommunikasiya Texnologiyaları Agentliyi (İKTA) poçt rabitəsi xidmətlərindən istifadə edən vətəndaşlara ölkəyə gətirilməsi qadağan olunan və ya xüsusi icazə ilə idxal edilən məhsulların sifarişi və göndərilməsi zamanı qanunvericiliyin tələblərinə ciddi əməl etməyə çağırıb.

Xeberler.az bildirir ki, Agentlikdən verilən məlumata görə, bu kateqoriyaya baytarlıq preparatları, dövlət sınağından keçməmiş və qeydiyyata alınmamış pestisidlər, bioloji preparatlar və aqrokimyəvi maddələr, uyğunluq və fitosanitar sertifikatı olmayan toxumlar, bioloji aktiv qida məhsulları, qida və yem məhsulları, qida ilə təmasda olan materiallar, eləcə də heyvan mənşəli qida məhsulları daxildir.

İKTA istifadəçilərə poçt göndərişini təhvil verməzdən əvvəl Azərbaycan Respublikasının Qida Təhlükəsizliyi Agentliyi (AQTA) və poçt operatorlarından mövcud qaydalar, məhdudiyyətlər və tələb olunan sənədlər barədə məlumat almağı tövsiyə edir.

Qeyd olunub ki, “Poçt haqqında” qanunun 18-ci maddəsinə əsasən, qadağan olunmuş əşyaların göndərilməsi və ya düzgün qablaşdırılmaması nəticəsində digər göndərişlərə ziyan vurulmasına görə həm poçt operatoru, həm də istifadəçilər eyni dərəcədə maddi məsuliyyət daşıyırlar.

Bildirilib ki, bu kateqoriyaya aid məhsullar aidiyyəti qurumlar tərəfindən saxlanıla və müsadirə oluna bilər. Bu səbəbdən vətəndaşlara poçt vasitəsilə göndəriş etməzdən əvvəl malların daşınması və idxalı ilə bağlı hüquqi tələbləri dəqiqləşdirmək tövsiyə olunur.

İKTA vətəndaşları sifariş etdikləri və ya göndərmək istədikləri məhsulların hüquqi rejimini əvvəlcədən yoxlamağa, zərurət yarandıqda tənzimləyici quruma, AQTA-ya və ya poçt rabitəsi operatorlarına müraciət etməyə çağırır.