RADİOTEZLİKLƏR

Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyi (İKTA) radiospektr idarəçiliyini həyata keçirən səlahiyyətli orqan olmaqla yanaşı, radiotezliklərdən səmərəli istifadənin təşkili, eləcə də Azərbaycan Respublikasının radiotezlik ehtiyatlarından istifadənin tənzimlənməsində və mühafizəsinin həyata keçirilməsində iştirak edir.

Radiospektr idarəçiliyinin təşkili üçün radiotezliklərdən səmərəli istifadənin təşkili, eləcə də radiotezlik ehtiyatlarından istifadənin tənzimlənməsi və mühafizəsinin həyata keçirilməsi tələb olunur.

Bu məqsədlə radioelektron vasitələrin və mülki dövriyyəsi məhdudlaşdırılmış əşyaların idxal-ixracı üçün mövcud prosedurların, eyni zamanda mülki dövriyyəsi məhdudlaşdırılmış əşyaların xüsusi icazələrinin, uyğunluq sertifikatı olmayan telekommunikasiya vasitələrinin və qurğularının ümumistifadəli telekommunikasiya şəbəkələrində istismarına yol verilməməsinə nəzarət mexanizminin, istismara verilən avadanlıqların qeydiyyatının vahid iş axınında əks etdirilməsi radiospektr idarəçiliyinin əsasını təşkil edir.

Qeyd edilən proseslərin optimallaşdırılması və şəffaflaşdırılması məqsədilə proseslər sadələşdirilib və bunun əsasında “Radioelektron vasitələrə verilən icazələr” adlı elektron xidmət yaradılıb.

Operator və provayderlər, o cümlədən sahibkarlar idxal etmək istədikləri radioelektron vasitələri ilə bağlı sənədləşmə işlərini “bir pəncərə” prinsipi ilə “Radioelektron vasitələrə verilən icazələr” sistemi üzərindən həll etmək imkanı qazanacaqlar. Bu, həm əlavə vaxt itkisinin qarşısının alınmasına, həm də radiotezliklərdən səmərəli istifadənin təşkilinə xidmət edir.

Belə ki, qeyd edilən avadanlıqların ölkəyə gətirilməsini həyata keçirmək istəyən şəxs portala daxil olmaqla ilk olaraq nümunə üçün gətirdiyi məhsulların parametrlərini, qanunvericilikdə nəzərdə tutulmuş digər məlumatları və Akkreditasiyadan keçmiş Sınaq Laboratoriyası (ASL) tərəfindən verilmiş sertifikatları daxil edir. Əşyaların dövriyyəsinə xüsusi icazə almaq üçün təqdim edilən sənədlər müvafiq dövlət orqanı tərəfindən müəyyən edilmiş qaydada baxılır. Təqdim edilmiş sənədlərdə çatışmazlıqlar və ya imtina üçün əsas olmadıqda müvafiq dövlət orqanında sənədlər qeydə alındığı gündən başlayaraq 10 gündən gec olmayan müddətdə əşyaların dövriyyəsinə xüsusi icazə verilməsi haqqında qərar qəbul edilir. Tətbiq edilən iş axını və informasiya sistemi nəticəsində əşyaların dövriyyəsinə xüsusi icazə verilməsi üçün tələb olunan müddət minimuma endiriləcək.

Növbəti mərhələlərdə radiotezliklərin ayrılması üçün elektron müraciətlərin qəbulu da bu sistem vasitəsilə mümkün olacaq. Nəticədə radiotezliklərin, radiovasitələrin səmərəli istifadəsinin təmin olunması üçün istismarın təşkili ilə əlaqədar bütün məlumatların vahid informasiya sistemində toplanılması ilə tamamlanacaq.

Radioelektron vasitələrin idxalı ilə məşğul olan, yaxud bu proseslə maraqlanan fiziki və hüquqi şəxslər “Radioelektron vasitələrə verilən icazələr” sistemi barədə sual və təkliflərlə bağlı İKTA-nın [email protected] elektron poçt ünvanı, yaxud (+99412) 493-38-52 telefon nömrəsi vasitəsilə əlaqə saxlaya bilərlər.