İNTERNET

Azərbaycanın telekommunikasiya və poçt sahələrində tənzimləyici qurumu olan İnformasiya Kommunikasiya Texnologiyaları Agentliyi (İKTA) tərəfindən yaradılan “E-Şikayət” sistemi üzərindən daxil olan vətəndaş müraciətlərinin sayı və dinamikası mütəmadi olaraq təhlil edilir.

Xeberler.az bildirir ki, agentlikdən bildirilib ki, əldə olunan nəticələr əsasında bazar iştirakçılarına vətəndaş məmnunluğunun artırılması və istehlakçı hüquqlarının qorunması istiqamətində tövsiyə və təkliflər təqdim olunur.

Qeyd olunub ki, sistemdə hər bir telekommunikasiya operatoru, provayder və poçt rabitəsi operatoru üçün ayrıca şəxsi kabinet mövcuddur. İstehlakçıların şikayətləri birbaşa həmin kabinetlərdə əks olunur və bu, Agentliyə prosesləri operativ şəkildə izləmək və təhlil etmək imkanı verir.

2026-cı ilin birinci rübü ərzində telekommunikasiya və poçt xidmətləri üzrə ümumilikdə 1741 şikayət qeydə alınıb. Müraciətlərin 45,8%-i internet (GPON, ADSL və s.) və sabit telefon rabitəsi, 22,6%-i mobil internet və rabitə, 31,6%-i isə poçt xidmətləri ilə bağlı olub.

Hesabat dövründə sistem vasitəsilə gündə orta hesabla 19 şikayət daxil olub. Müraciətlər ümumilikdə 81 xidmət təchizatçısını əhatə edib.

Telekommunikasiya xidmətləri üzrə isə 1191 müraciət daxil olub. Bunların 61,8%-i internet xidmətləri, 33%-i mobil rabitə və mobil internet, 5,2%-i isə telefon rabitəsi ilə bağlıdır.

İnternet xidmətləri üzrə müraciətlərdə ən çox pay 16,1%-lə xidmətin işləməməsi, 13,5%-lə xidmət keyfiyyəti problemləri, 10,8%-lə isə xidmət təchizatçılarının təqdim etdiyi xidmətlərlə bağlı məsələlərə aiddir.

Mobil rabitə xidmətləri üzrə şikayətlərin əsas hissəsi nömrədaşıma (operator dəyişdirilməsi) ilə bağlı olub və bu kateqoriya 11,7% təşkil edib. Tariflərlə bağlı müraciətlər 6,4%, xidmətlə bağlı şikayətlər isə 2,9% olub.

Telefon rabitəsi üzrə müraciətlərin 1,5%-i xidmətin işləməməsi, 1,3%-i infrastruktur problemləri, 1,1%-i isə xidmət keyfiyyəti ilə bağlıdır.

Mobil internet xidmətləri üzrə isə ən çox müraciətlər 2,5%-lə şəbəkə problemləri və tariflər, 0,6%-lə xidmət keyfiyyəti ilə bağlı qeydə alınıb.

Poçt rabitəsi xidmətləri üzrə 2026-cı ilin birinci rübündə 550 müraciət daxil olub ki, bu da ümumi şikayətlərin 31,6%-ni təşkil edir. Bu müraciətlərin 90,7%-i poçt göndərişlərinin gecikdirilməsi, çatdırılmaması və ya itirilməsi ilə bağlıdır.

Digər müraciətlərin 4,5%-i müştəri xidmətləri, 4,8%-i isə ödənişlər, obyektlərin vəziyyəti və proqram təminatının işləkliyi ilə əlaqədar olub. Ümumilikdə müraciətlərin 88,7%-i sürətli poçt xidmətləri, 11,3%-i isə universal poçt xidmətləri üzrə qeydə alınıb.

Sosial-coğrafi təhlillərə əsasən, müraciətçilərin 57,2%-i ünvan olaraq Bakını göstərib. Abşeron–Xırdalan üzrə bu göstərici 4,8%, Sumqayıt üzrə isə 4,3% təşkil edib.

Ümumilikdə müraciətlərin 78,9%-i Bakı, Abşeron–Xırdalan, Sumqayıt, Cəlilabad, Gəncə, Lənkəran, Quba, Naxçıvan, Ucar və Astara daxil olmaqla 10 əsas bölgənin payına düşür.

2026-cı ilin birinci rübü üzrə sistemə müraciət edənlərin 88,3%-ni kişilər, 11,7%-ni isə qadınlar təşkil edib.