AZNET

Gələn ildən Netflix, Megogo, Oll.tv kimi xarici Tv xidmətlərinin bəzilərinin ölkəmizdə qapadılması ehtimalı var. Bu məsələ gələn il gündəmə gələcək. Ola bilər ki, bu video xidmət platformaları Azərbaycanda yayım üçün lisenziya almalı olacaqlar. Lisenziya almayanların yayımı isə məhdudlaşdırıla bilər.

Xeberler.az xəbər verir ki, bu barədə Azərbaycan İnternet Formunun prezidenti Osman Gündüz bildirib. O qeyd edib ki, artıq bir neçə gündür internet üzərindən yayım göstərən qanunsuz, yəni lisenziya almayan TV xidmətlərlə bağlı müzakirələr gedir. Hiss olunur ki, bu tip yazılar bir mənbədəndir və məqsədyönlüdür. Söhbət Netflix, Megogo, Oll.tv, İlook TV, Vimeo və s. bu kimi video xidmət platformalarının fəaliyyətindən gedir:

“Rayonlarda keyfiyyətli internet istifadəçiləri artdıqca internet üzərindən bu tip TV xidmət alanların da sayı kəskin artır. Ümimiyyətlə, hazırda ölkəmizdə qanunsuz yayımlanan video xidmətlərin , xarici İP və OTT platformların istifadəçilərinin sayının 300 mindən artıq olduğu bildirilir.
Düşünmək olar ki, gələn ildən onların bəzilərinin ölkəmizdə qapadılması gündəmə gələcək. Yaxud da bu video xidmət platformaları Azərbaycanda yayım üçün lisenziya almalı olacaq.
Əlbəttə, bu tip platformalar içərisində 1-2 manat abunə haqqı alıb TV xidmət göstərənlər də var. Hansı ki, qapadılma ilə bağlı nəinki iqtisadi əsaslar, hətta milli maraqlarımıza zidd olan məqamlar da tapmaq mümkündür. İnformasiya təhlükəsizliyimiz üçün təhdid yaradan kanallar da var. Rusiyanın da belə resursları çoxdur.
Amma burada elə platformalar var ki, ciddi araşdırma aparmadan, ciddi əsaslar olmadan onların qapadılmasının belə gündəmə gətirilməsi doğru olmazdı.
Ümid edirəm aidiyyatı qurumlar, RİNN, Audiovizual Şura bu istiqamətdə maraqlı tərəfləri cəlb etməklə ictimai müzakirələr təşkil edəcək”.