TEXNOLOGİYA

Microsoft şirkəti İnformasiya Texnologiyaları İnstitutu ilə əməkdaşlığı genişləndirmək niyyətindədir.

AMEA-dan Xeberler.az-a verilən məlumata görə, bu barədə Microsoft Azərbaycan şirkətinin təhsil proqramları üzrə meneceri Emin Axundov İnformasiya Texnologiyaları İnstitutunun Elmi Şurasında çıxışı zamanı məlumat verib.

İnstitut ilə əməkdaşlıq imkanlarından söz açan şirkət rəsmisi Microsoft Azərbaycan-ın sertifikatlaşdırma mərkəzinin məhz İnformasiya Texnologiyaları İnstitutunda təşkil olunmasının məqsədəuyğun olduğunu bildirib.

Şirkətin sertifikat proqramları və onların üstünlüklərindən  söz açan E.Axundov bütün məhsul və texnologiyalar üzrə sənaye sertifikatlaşdırmasının mümkün olduğunu, ali təhsil qurumlarında təhsil alan tələbələrə, akademik diplomla yanaşı, sənaye diplomunun da təqdim ediməsinin zəruriliyini qeyd edib.

O, Azərbaycan elmi ictimaiyyəti üçün böyük verilənlərin analitikası, superkompüterlərin gücü və bulud texnologiyalarından istifadə ilə bağlı təbliğat işlərinin aparılmasının mühüm əhəmiyyət kəsb etdiyini vurğulayıb.

Microsoft şirkətinin təqdim etdiyi Office proqramının mütəmadi olaraq yeniləndiyini  diqqətə çatdıran E.Axundov bu proqramın ən son məhsulları üzrə tədris vəsaitlərinin mövcud olduğunu, onların tərcümə edilərək elmi qurumların istifadəsinə verilməsinin vacibliyini önə çəkib.

O bildirib ki,  Microsoft institut əməkdaşlarına korporativ domen adı altında məhdudiyyətsiz e-poçt ünvanları, hər bir istifadəçiyə buludda onlayn video-konfransların təşkil edilməsi və yazılışı üçün 1 terabayt saxlanc, biznes-analitika üzrə 20-dən çox xidmət təqdim edir.

Emin Axundovun sözlərinə görə, İnformasiya Texnologiyaları İnstitutu da daxil olmaqla, AMEA-nın elmi təşkilatları da şirkətin elm və təhsil qurumları üçün nəzərdə tutduğu endirimlərdən yararlana, bir çox məhsulları pulsuz əldə edə biləcək.

Xeberler.az olaraq məsələ ilə bağlı daha ətraflı məlumat üçün  Microsoft Azerbaijan-la əlaqə saxladıq.

Şirkətdən sorğumuza cavab olaraq qeyd edilib ki, söhbət Microsoft  imtahanlarının keçirilə biləcəyi test mərkəzindən gedir.

Bakıda bu cür bir neçə mərkəz mövcud olduğunu deyən şirkət akademik auditoriya üçün isə İnformasiya Texnologiyaları İnstitutunda bu cür mərkəzin yaradılmasını məqsədəuyğun hesab etdiklərini bildirib.

Şirkətin məlumatına görə, burda tələbələr və gənc alimlər imtahanları güzəştli şərtlərlə verə biləcək.

Onu da bildirək ki, AMEA-nın akademik-katibi, institutun direktoru, akademik Rasim Əliquliyev  Microsoft  ilə əməkdaşlıq əlaqələrinin genişləndirilməsini yüksək qiymətləndirərək bu məqsədlə İşçi qrupun yaradılması və Fəaliyyət planının hazırlanmasının önəmini vurğulayıb.

O, rəhbərlik etdiyi qurumun AMEA-nın İKT siyasətini həyata keçirdiyini qeyd edən alim Microsoft Azərbaycan-ın sertifikat mərkəzinin məhz bu institutda təşkil edilməsinin mühüm əhəmiyyət kəsb etdiyini bildirib.

 Məltəm Talıbzadə