Xeberler.az bildirir ki, bir sıra xəbər saytlarımıza kiber hücumlar olub. Nəticədə bu informasiya resurslarının fəaliyyətində müyyən problemlər yaşanıb.
"Ümumiyyətlə, Ermənistanla müharibə şəraiti vəziyyətində olan ölkəmizin milli informasiya resursları zaman-zaman bu tip kiber hücumlara məruz qalır".
Bu sözləri Azərbaycan İnternet Formunun Prezidenti, ekspert Osman Gündüz deyib:
"Müharibənin getdiyi indiki zamanda isə aparıcı informasiya resurslarımızın, onların sosial media resurslarının dayanıqlığı ciddi əhəmiyyət kəsb edir.
Son müharibələrin də tarixi göstərir ki, düşmən tərəf əsas informasiya resurslarını sıradan çıxarmağa ciddi önəm verir.
Bu arada xarici dillərdə informasiya yayan bizim milli resurslarımıza qarşı kiberhecumların daha da kəşkinləşəcəyini gözləmək olar. Ön cəbhədə aktiv döyüşlər getdiyi bir zamanda informasiya məkanında da müharibənin kəskinləşəcəyi qaçılmazdır. Düşmən hər vasitə ilə informasiya resurslarımızın normal fəaliyyətini əngəlləməyə, imkan olarsa sıradan çıxarmağa çalışacaq. Auditoriyası geniş olan informasiya resursu sahibləri isə daha diqqətli olmalıdır.
Bu resursların dayanıqlığı bir informasiya təhlükəsizliyi məsələsidir. Vətəndaşlarımız ilk informasiyanı, doğru düzgün informasiyanı məhz bu resurslardan alırlar. Bu isə ictimai fikrin, əhal-ruhiyyənin formalaşmasında mühüm rol oynayır".
Ekspert məsələnin həlli ilə bağlı bir sıra təkliflər irəli sürüb:
"Düşünürəm ki, müharibə şəraitində olan ölkənin informasiya resursunun təhlükəsizliyinin təminatını yalnız bu resurs sahiblərinin üzərinə atmaq da doğru olmazdı. Əlbəttə ,ilk öncə xəbər saytlarının rəhbərləri öz resurslarının təhlükəsizliyinin qayğısına qalmalıdırlar. Sahə üzrə peşəkar mütəxəssislər cəlb edilməlidir. Alternativ data mərkəzlərdən istifadə edilməli, daim monitorinq aparılmalı, resursun ehtiyat variantları çıxarılmalıdır, əməkdaşların elementar təhlükəsizlik qayydalarına əməl etməsi təşkil edilməlidir.
Bununla belə düşünürəm ki, milli informasiya resurslarımızın təhlükəsizliyinə hökumət də diqqət yetirməli, dəstək göstərməlidir.Zəruri informasiya insanlara həmişə bir anda, zamanında gərəkli olur.
Vətəndaşlarımız bu informasiyanı haradan əldə edir?
Bu baxımdan müharibə şəraitində milli informasiya resurslarımızın dayanıqlığı çox əhəmiyyət kəsb edir.
Düşünürəm ki yerli data mərkəzlərdən internet media üçün güzəştli istifadəylə bağlı şərait yaradılmalı, təhlükəsizliklə bağlı mütəxəssis hazırlığına, təlimlərin keçirilməsinə, xəbər saytlarının təhlükəsizliklə bağlı audit olunmasına KİVDF köməklik göstərməli, bu məqsədlə resurslar ayırmalıdır. KİVDF xəbər saytlarının texniki xərclərini də öz üzərinə götürə bilərdi. KİVDF-nin 5 -10 nəfərin oxuduğu hansısa qəzetə 20 min pul ayırmaqdansa 20 min adamın daxil olduğu xəbər saytının təhlükəsizliyi qayğısına qalması daha doğru olardı.
Yeri gəlmişkən, düşünürəm ki, dövlətə məxsus internet resurslarının və dövlət informasiya resurslarının təhlükəsizliyinə də bu arada diqqət artırılmalıdır. Alternativlərin , rezervlərin qaydasında və işlək vəziyyətdə olmasına xüsusi diqqət yeyirilməlidir".
Osman Gündüz bildirib ki, kiber hücuma məruz qalan vətəndaşlar, həmçinin xəbər resursların sahibləri informasiya təhlükəsizliyi ilə bağlı, metodiki-informasiya dəstəyi üçün NRYTN yanında Elektron Təhlükəsizlik Xidmətinə də müraciət edə bilərlər.
"Adı çəkilən dövlət xidməti bu arada qeyri-dövlət sektorunun, vətəndaşların informasiya təhlükəsizliyinin təminatına xüsusi diqqət yetirməli, metodiki-informasiya dəstəyini gücləndirməlidir" - deyə sonda Osman Gündüz bildirib.
