TV VƏ RADİO

 Cənubi Qafqazın aparıcı media-platformalarından biri olan Myvideo Azərbaycanın kino məhsullarının Yaxın Şərq, Fars Körfəzi və Şimali Afrika ölkələrinin bazarlarına çıxmasını təmin etmək üçün öz fəaliyyətini aktivləşdirir.

Şirkətdən Xeberler.az-a verilən məlumata görə, bu istiqamətdə fəal danışıqlara cari ilin mart ayında Türkiyənin paytaxtında keçiriləcək beynəlxalq “DISCOP ISTANUL 2016” sərgisi çərçivəsində başlanacaq.

Sərgi çərçivəsində Myvideo-nun işçi qrupu yuxarıda qeyd edilmiş region ölkələrinin ərazilərində kino məhsullarının kinoteatrlarda nümayişi ilə məşğul olan şirkət və təşkilatların nümayəndələrilə bir sıra görüşlər keçirəcək. Həmin görüşlər zamanı həm mövcud olan, həm də çəkilişi planlaşdırılan filmlərin prokata çıxarılması imkanları müzakirə olunacaq.

Məlumatda qeyd edilib ki, Azərbaycanın kino sənayesi öz imkanlarını və potensial bazarları real qiymətləndirməlidir. Ölkənin kino məhsulları üçün ən perspektivli ölkələr məhz mental cəhətdən bizə daha yaxın olanlar və filmlərimizi hər cəhətdən qiymətləndirə bilən ölkələrdir. Eyni zamanda, Cənubi Koreya və İndoneziyanın təcrübəsi bizə onu göstərir ki, hətta “qərb ölkələri” anlayışına daxil olmayan ölkələrdən belə qərb tamaşaçısının ürəyini fəth edə biləcək filmlər çıxa bilir. Ona görə də yerli kino sənayesinin inkişaf etməsi ilə Azərbaycan filmləri tez və ya gec Avropa ekranlarına çıxış yolunu tapacaq.

Qeyd edək ki,  “DISCOP ISTANBUL” sərgisi kinokontent sahəsində keçirilən ən mötəbər tədbirlərdəndir. Sərgidə 70-ə yaxın ölkədən 1000-dən çox şirkət və təşkilat iştirak edir.

Sərgi zamanı müxtəlif janrlara aid kontent (kinofilmlər, teleseriallar və teleproqramlar, animasiya layihələri, telefilmlər, sənədli dramalar və s.), həmçinin prodakşn studiyalarının istehsal imkanları və xidmətləri təqdim olunacaq. Əsas diqqət beynəlxalq layihələrin birgə istehsalında Azərbaycanın tərəfdaş kimi potensialının açılmasına yetiriləcək.

Günel