"Fərid bəyin (red-Fərid Pərdəşünas) və digər ictimai fəalların problemi, yəni çox sayda şəhidlərin məqalələrinin bir anda silinməsini qabartması və ictimailəşdirməsi, davamlı olaraq gündəmdə saxlaması doğru bir yanaşma idi".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz 3 min şəhidin məlumatlarının
wikipediadan silinməsi məsələsinə münasibət bildirərkən deyib:
"Bununla belə qlobal bir platformanın lokal icmasında yaranan problemin həlli istiqamətində hazırda tutulan yol ağlabatan deyil".
Ekspertin sözlərinə görə, görünən odur ki, sonda biz bir problemi həll etmək istədiyimiz zaman Azərbaycan maraqlarına cavab verməyən başqa bir problemlə üzləşərik.
Osman Gündüz vurğulayıb ki, problem "3000 şəhidin məqaləsinin" silinməsində yox, Azviki icmasının idarəçiləri arasında yaranan böhranla, icma ilə idarəçilər arasında yaranan narazılıqla, bu böhranın dərinləşməsindən doğan, ölkəmizin maraqlarına cavab verməyən nəticələrlə bağlıdır:
"Yəni görünən odur ki, bizim dostlarımız nəticədən daha çox yapışıblar.
Əgər biz böhranı aradan qaldırmasaq, indiki nəticə öz həllini tapsa da, gələcəkdə digər problemlər qaçılmaz olacaq. Amma qlobal resurs üçün, onun bəlli qaydaları var və konflik həll edən qurumları var".
Ekspertin sözlərinə görə. icmada böhran olanda mütləq bu üst səviyyədə həllini tapmalıdır. Azviki icmasında sağlam, demokratik, şəffaf, kollegial və icma üzvlərinin hamısının özünüidarəsinə əsaslanan bir mühit formalaşdırmaq çox vacibdir. Aşağı səviyyədə idarəçilərə davamlı təzyiqlər, gözüm-çıxdıya salmaq, "xain elan etmək" yolverilməzdir.
Osman Gündüz onu da qeyd edib ki, Azviki icması Azərbaycan maraqlarının reallaşmasında pulsuz-parasız, ictimai əsaslarla xeyli faydalı işlər gördüyünü də xatırlatmaq lazımdır.
