SOSİAL MEDIA

Son vaxtlar bəzi Facebook qruplarında müəyyən problemlər yaşanır. Belə ki, qrup istifadəçiləri paylaşdıqları postların qəsdən silinməsi, həmçinin paylaşımlara gələn şərhlərin və rəylərin də silinməsindən narahatıqlarını bildirirlər.

Xəbərlər.az məsələ ilə bağlı araşdırma aparıb.

İT mütəxəssis Fərid Kazımov deyir ki, belə qruplarda paylaşılan xəbərin silinməsi bəzi hallarda adminlərin subyektiv yanaşması ilə bağlı olur:

“Yəni , admin olaraq hər bir şəxs bu və ya digər xəbəri grup üçün maraqsız hesab edirsə, həmin xəbər silinir. Facebook -da startaplarla bağlı bu yaxında bir mübahisənin şahidi olmuşam. Belə ki, startap sahibi onunla bağlı artıq ikinci postun silindiyini bəyan edirdi. Amma məsələdən tam məlumatlı olmadığımız üçün kimin haqqlı olmağını deyə bilmərik”.

Fərid Kazımov hesab edir ki, ictimai sosial qrupdan söhbət gedirsə, adminlərin biznes maraqları kənarda qalmalıdır”.

İT mütəxəssisi optimal şəffaf və biznes marağı olmayan adminin belə qrupları idarə etməsini təklif edib:

“Növbəti bir problem isə bəzən hər hansı şəxs belə qruplardan mövzuya aid olmayan , yaxud öz xidmətini və ya malını reklam edərək post yerləşdirir. Bu baxımdan da adminlərin bu seqmentdə hər hansı bir marağı olmamalıdır. Belə anlaşılmazlığın qarşısını almaq üçün adminin fəaliyyəti zəruridir”.

“Startup Azərbaycan” qrupunun adminlərindən biri olan Vaqif Abbasov qeyd edib ki, qrupda startuplar yalnız öz məhsulları və yenilikləri barədə məlumat verə bilərlər. Lakin onların keçirdikləri aksiyaları, kampaniyaları qrupda paylaşılarsa, dərhal silinir. Onun sözlərinə görə, yalnız hər hansı startup qrupa özəl kampaniya edərsə bunu silmirik hətta dəstək oluruq.

Vaqi Abbasov qrupda reklam xarakterli, təkrar olan , etik qaydaları pozan paylaşımların silindiklərini qeyd edib.

www.Professionals.az saytından Xəbərlər.az-a bildiriblər ki, onlar yeni məhsulları ilə bağlı 2 dəfə qrupda paylaşım etsələr də, postları silinib:

“ Qrupun adminləri ilə əlaqə saxlamağa çalışdıq. Adminlərin məsələyə münasibətləri fərqli oldu. Adminin biri postu silmədiyini dedi, digəri isə məlumatın reklam xarekterli olduğü üçün silindiyini bildirdi. Yəni, onların özləri arasında da qeyri-müəyyənlik var. Hesab edirik ki, bu qrupun istifadəçilərinə qarşı qərəzli münasibətdir”.

Məsələyə münasibət bildirən Azərbaycan İnternet Forumunun prezidenti Osman Gündüz də qruplarda belə problemin artıq son dövrlərdə kəskinləşdiyini bildirib. O, bunun əsas səbəbinin qruplarda ictimai maraqlar baxımından vahid qaydaların olmaması, qrupların adminlərinin ictimai deyil, şəxsi və ya kommersiya maraqalrı güdməsi ilə bağlı olduğunu diqqətə çatdırıb.

Osman Gündüz artıq problemlə bağlı ciddi mesajların da daxil olduğunu  diqqətə çatdırıb.

Osman Gündüz istənilən tədbirdə, kampaniyada, hərəkatda ictimai maraqların önəm kəsb etməsinin 1-ci şərt olması kimi dəyərləndirib. O, Azərbaycanda startap hərəkatının əsasını qoyan və kifayət qədər uğurlu nəticələr əldə edən “Startup Azərbaycan” layihəsinin də uğurunun məhz komandada ictimai maraqların öndə olması ilə bağlı olduğunu bildirib.

Vəziyyətdən çıxış yolu olaraq Osman Gündüz bildirib ki, hazırda Startup Azərbaycan Komandasında bu problemin həlli yolları müzakirə olunur.

Onun sözlərinə görə, əgər məsələ ilə bağlı müsbət nəticə əldə olunmazsa , biznes marağı olmayan, konkret bir startupa, investora aidiyyatı olmayan adminlərdən ibarət ictimai əhəmiyyətli bir qrupun da Startup Azərbaycan tərəfindən yaradılması istisna edilmir.

Osman Gündüz startapların tanıtımı üçün, komanda formalaşdırması və ictimai dəstək qazanmsı üçün müstəqil qrupların olmasını çox faydalı hesab edib.

"Əgər mövcud qruplardan hansındasa həqiqətən də startupların tanıdılmasına yönələn qeyri-reklam xarakterli xəbərləin getməsi məqbul hesab edilmirsə, deməli indiki zamanda ciddi əhəmiyyət kəsb edən bu tanıtım məsələsini də üzərinə götürən normal bir ictimai yönümlü qrupun yaradılması zəruridir", deyə o əlavə edib.

Məltəm Talıbzadə