Xeberler.az bildirir ki, ötən gün Operativ Qərargah rayonlara və Bakıya gediş gəlişdə əvvəlki avtomatlaşdılrılmış (portal vasitəsilə) icazə sisteminin ləğv edildiyini bildirib. Eyni zamanda xidməti vəsiqə ilə də hərəkət etmək mümkün olmayacaq. İndi bu cür icazə ezamiyyə vərəqələri əsasında, polis postlarında kustar formada yoxlamaqla tənzimlənəcək. Ezamiyyə vərəqələrini də dövlət və özəl qurumlar verə bilər.
Məsələ ilə bağlı Azərbaycan İnternet Formunun Prezidenti, ekspert Osman Gündüz açıqlama verib:
"Düşünürəm ki, bu doğru bir yanaşma deyil. Təəccüblənirəm həm də ona görə ki , görən nə əcəb indiyədək, Operativ Qərargah, ASAN və TƏBİB bununla bağlı normal bir rəqəmsal həll hazırlaya bilməyiblər.
Ötən gün təklif olunan ezamiyyə üsulu, fikrimcə xeyli əlavə problemlər üzə çıxacaq, saxta ezamiyyələr yazılacaq və bu sahədə qeyri-şəffaf mühit formalaşacaq.
Prosesə nəzarət etməli olan qurumların da işi çərtinləşəcək. Rüşvət və korrupsiya riskləri artacaq. Düşünürəm ki, daha ağlabatan variantlar fikirləşmək olardı.
Fikrimcə, indiki yumşalma çərçivəsində rayonlara və Bakıya sərbəst gediş gəlişi xeyli yumşaltmaq, əsasən bərpa etmək doğru olardı. Yalnız yoluxması təsdiqlənənlərə, müvafiq testlərin nəticələrinə əsaslanaraq məhdudiyyətlər tətbiq olunması məntiqli olardı.
Düşünürəm ki, buna nəzarəti də rəqəmsal həllər vasitəsilə gerçəkləşdirmək olar.
İstənilən halda, vətəndaşların kütləvi hərəkətlərini tənzimləmək üçün rəqəmsal həllərə söykənən tənzimləmələr tətbiq etmək daha doğru yanaşmadır. Hansı ki ASAN -nın əvvəlki SMS və İcazə həlləri daha uğurluydu.
Beləliklə, hesab edirəm ki, rayonlar və Bakı arasında gediş-gəliş tənzimləmələri üçün indiki halda Operativ Qərərgahın təklif etdiyi üsul təkmil deyil və qüsurludur".
