TEXNOLOGİYA

İT-nin çoxaspektli problemləri üzrə mobil Cloud Computing texnologiyalarının elmi-nəzəri problemlərinin araşdırılması davam etdiriləcək.

Həmçinin mobil Cloud Computing texnologiyalarında virtual resurslardan səmərəli istifadə üçün metod və alqoritmlərin işlənməsi istiqamətində elmi-tədqiqatlar aparılır.

Xeberler.az-ın məlumatına görə, bu barədə AMEA İnformasiya Texnologiyaları İnstitutunun texnologiyalar üzrə direktor müavini, texnika üzrə fəlsəfə doktoru, dosent Rəşid Ələkbərov deyib.

R.Ələkbərov  qeyd edib ki, bulud texnologiyalarında yaddaş resurslarından səmərəli istifadə, verilənlərin emalı mərkəzində yaddaş və hesablama resurslarının optimal paylanması və bulud texnologiyalarında istifadəçilərin məlumatlarının yaddaş qurğularında dinamiki paylanması üçün metod və alqoritmlərin işlənilməsi, verilənlərin emalı mərkəzində virtual maşınların və hesablama klasterlərinin yaradılması, eləcə də “Əşyaların İnterneti: mövcud vəziyyəti, inkişaf perspektivləri, problemlər və həlli yolları” mövzusu üzrə araşdırmalar aparılır:

“AzScienceNet şəbəkəsində Enterprise Desktop Grid xidmətlərinin, virtual laboratoriyaların yaradılması istiqamətində işlərin davam etdiriləcəyini, AzScienceNet şəbəkəsində proqramla idarə olunan (Software Defined Networking – SDN) şəbəkə texnologiyalarının, Green Computing texnologiyalarının mövcud vəziyyəti, imkanları, inkişaf perspektivləri və problemlərinin tədqiq olunacağını söylədi. Qeyd etdi ki, AzScienceCert-də toplanan insidentlər əsasında təhlillər aparılacaq və təkliflər hazırlanacaq”.

Onun sözlərinə görə,  “Elektron elm və onun funksional altsistemlərinin sintezi üçün yeni metod və alqoritmlərin işlənilməsi” qrant layihəsi üzrə elmi tədqiqatlar bu il də davam etdiriləcək.

R.Ələkbərov AzScienceNet-in infrastrukturunun genişləndirilməsi və şəbəkədə yeni xidmətlərin təşkili işlərindən də danışıb:

“Şəbəkənin infrastrukturunun intellektual kommutatorlar əsasında yenidən qurulması, AzScienceNet üzərindən ElmTV İnternet televiziyasının monitorlar şəbəkəsinin genişləndirilməsi və istismarı, AMEA-nın elmi müəssisə və təşkilatlarının AzScienceNet-ə fiberoptik əlaqə kanalları vasitəsilə qoşulması işlərinin davam etdirilməsi planlaşdırılır”.

Alim İnternet üzərindən onlayn TV yayımının təşkili, AzScienceNet-də “Multimedia Qalereyası” sisteminin istismarı işləri, Cloud Computing xidmətindən istifadə edilməsinin təşkili və s. ilə bağlı tədbirlərin həyata keçiriləcəyini bildirib.

Günel