Bu gün Baş nazir Əli Əsədovun sədrliyi ilə İqtisadi Şuranın və Azərbaycan İnvestisiya Holdinqinin Müşahidə Şurasının
birgə iclası keçirilib.
Toplantıda siyahısı öncədən təsdiqlənən bir çox nəhəng dövlət müəssisələrinə özəl investisiyaların cəlb edilməsi, yəni özəlləşdirilməsi ilə bağlı tədbirlər ətrafında müzakirələr aparılıb.
Bu siyahıda Baktelecom və Aztelekom da var.
Toplantıda nazirlər Mikayıl Cabbarov və Rəşad Nəbiyevin siyahıdakı dövlət müəssisələrinin özəlləşdirilməyə hazırlanması ətrafında məruzələri dinlənilib.
İclasın yekununda İqtisadi Şuranın və AİH-in Müşahidə Şurasının üzvlərinin rəy və təklifləri nəzərə alınmaqla qərarlar qəbul edildiyi açıqlanıb.
Vəssalam, başqa məlumat verilməyib.
Görəsən hansı qərarlar olub?
Siyahısı Prezident tərəfindən təsdiqlənən dövlət qurumları tam, yaxud qismən özəlləşdiriləcək?
Bununla bağlı cəlb edilən beynəlxalq ekspertlərin rəyi necə olub ? Payların alınmasında xarici investorlar da iştirak edəcəkmi?
Təəssüf ki bu sualların cavabını toplantı haqqında açıqlamada tapmaq mümkün deyil .
Xatırladıram ki, son iki ildə Aztelekom və Baktelekom-un sağlamlaşdırılması, şəffaf və korporativ idarəetmənin tətbiqi istiqamətində ciddi addımlar atılıb.
Nazir Rəşad Nəbiyev AYİB tərəfindən ayrılan 85 milyonluq kreditdən imtina ilə bağlı çox riskli qərar qəbul edərək, daxili resurslar hesabına investisiya yatıraraq, qısa zamanda bütöv ölkə üzrə nəhəng bir fiber optik şəbəkə formalaşdırmaqla Aztelekomu gəlir gətirən, stabil və cəlbedici bir quruma çevirə bilib.
Aztelekom hazırda həm magistral provayder, həm ölkə daxili telekom operator və həm də pərakəndə internet satışı həyata keçirən provayder funksiyalarına sahibdir.
Nazir məhz bu Aztelekomun digər özəl provayderlərlə tərəfdaşlığı ilə 2024-cü ilin sonunda bütün ölkə üzrə internet problemini həll etməyə söz verib. 85% işlər də artır yekunlaşıb.
Xatırladıram ki, son iki ildə Aztelekom və Baktelekom de fakto birləşsə də, de yure onların birləşməsinə Antiinhisar imkan verməyib. İki inhisarçının bir qurum altında birləşməsinə imkan verilməməsi ilə bağlı Antiinhisarın qərarı , yumşaq desəm ağlabatan olmayıb.
Bildiyim qədər bununla bağlı məhkəmə çəkişməsi davam edirdi.
Beləliklə, Aztelekom və Baktelekom özəlləşdirilirmi?
Hökumət hələlik bu məlumatı gizli saxlamağa üstünlük verib.
Osman Gündüz
