AVADANLIQ

Smartfon tədarükü bütün dünyada sürətlə azalmağa davam edir.

Xeberler.az xarici mediaya istinadən bildirir ki, bu barədə Beynəlxalq Data Korporasiyasının (International Data Corporation) açıqladığı hesabatda qeyd edilib.

Məlumata görə, smartfon tədarükünün azalması tendensiyası 2022-ci ildə də davam edib.

Hesabat dünyanın ən yaxşı beş telefon istehsalçısından dördünün telefon tədarükünün davamlı azalmasına diqqət çəkib.

“Apple” ilin üçüncü rübündə tədarüklərdə artım yaşayan yeganə brend olub.

Hesabatda “Samsung”, “Apple”, “Xiaomi”, “Vivo” və “Oppo” ilk beşlikdə yer alıb.

Bu brendlərdən yalnız “Apple” ötən ilin eyni dövrü ilə müqayisədə daha çox telefon göndərib. Ekspertlərin şərhinə görə, bu artıma yeni “iPhone 14” seriyasının satışa təqdim edilməsi təsir edib.

Buna baxmayaraq “Apple”, “Samsung” u taxtdan sala bilməyib.  Smartfon bazarında birinci yeri 21,2 faizlə “Samsung”, üçüncü yeri isə 17,2 faizlə “Apple” tutub.

2022-ci ilin üçüncü rübündə dünya üzrə smartfon tədarükləri illik müqayisədə 9,7% azalaraq 302 milyondan bir qədər az olub.

Hesabatda qeyd edilib ki, “Samsung” bu il 64 milyon smartfon tədarük edib,  əvvəlki ilin eyni dövründə bu rəqəm 69,5 milyon olub. Apple isə 51,9 milyon smartfon tədarük edib (əvvəlki ilin eyni dövründə 51,1 milyon), Xiaomi 40,5 milyon smartfon tədarük edib (əvvəlki ilin eyni dövründə 44,3 milyon).

Ekspertlərin şərhinə görə, son iki il ərzində bütün dünyada yaşanan bir çox böhranlar alıcılıq qabiliyyətinə, texnoloji cihazların istehsalı və satışına ciddi təsir göstərib. Bəzi ekspertlərin fikrincə isə, bu azalmada texnoloji məhsulların, xüsusən də smartfonların dayanıqlı olmasının da payı var.

Xatırladaq ki, smartfon istehsalçıların “şüurlu yavaşlamalara” görə ağır cəza almaları davam edir.