Xeberler.az olaraq məlumat vermişdik ki, Elektron Hökümətin İnkişafı Mərkəzi
yolumuzqarabaga.az adlı
sayt yaradıb.
Həmin gün daha bir sayt,
zefer.az da təqdim edilib. Dövlət Turizm Agentliyi nədənsə yolumuzqarabaga.az-ın sifarişini hansısa bir biznesə deyil, EHİM dövlət qurumuna verib.
Məsələyə Azərbaycan İnternet Formunun Prezidenti, ekspert Osman Gündüz münasibət bildirib.
Ekspertin sözlərinə görə, qarşısına ciddi dövlət vəzifələri qoyulan, ölkədə rəqəmsal hökumət quruculuğuna cavabdeh qurum olan EHİM əsas vaxtını müxtəlif qurumlar üçün saytlar hazırlamağa sərf edir.
"EHİM də gah çimərliklərə giriş saytı yaradır, gah satınalma portalı yaradır, gah kənd təsərrüfatı portalı yaradır, gah da ASAN üçün nəsə edir. İndi də avtobus biletlərini satacaq.
Elektron hökumət quruculuğu sahəsində problemlər isə yığılıb qalıb. eGov sahəsində əsas sənədlərdən biri olan dövlət informasiya sistemlərinin inteqrasiyası haqqında Prezidentin fərmanı indiyədək icra olunmayıb".
Osman Gündüzün sözlərinə görə, 2022-ci il olsa da, bəzi dövlət qurumları hələ də elektron formada olan sənədi kağıza çap etdirib notarial təsdiqini tələb edirlər, mənasız arayışlar tələb edirlər. Qanunvericiliyin eGov baxımından sadələşdirilməsi ilə heç kim məşğul deyil. EHİM bu sahə üzrə hüquqşünaslar, analitiklər işə götürmək, eGov inkişafına cavabdeh normal komanda formalaşdırmaq əvəzinə developerlər və vebmasterlərə üstünlük verir. Ümumiyyətlə, müşahidələr göstərir ki, bu qurumda kadr siyasəti son zamanlar düzgün aparılmır.
"EHİM rəqəmsal hökumət quruculuğunu kordinasiya etmək, tənzimləmək, inteqrasiya etmək əvəzinə daha çox cari kommersiya xarakterli işlərə baş vurmaqla, saytlar yaratmaq və onları dəstəkləmək üçün resurslar ayırmaqla məşğuldur.
Baxıram ki, sektoru tənzimləməli olan EHİM əməkdaşı avtobusa bilet satışı prosesini izah etməklə məşğuldur".
Ekspert düşünür ki, Vətəndaşlara Xidmət və Sosial İnnovasiyalar üzrə Dövlət Agentliyi öz tabeçiliyində olan qurumlara nəzarəti gücləndirməli, prioritetlər üzrə hesabatlar tələb olunmalıdır. Dövlət Agentliyi Mərkəzin daha çox konseptual eGov quruculuğu məsələlərinə köklənməsini, kommersiyaya deyil tənzimləməyə istiqamətlənməsini təmin etməlidir.
"Rəqəmsal hökumət quruculuğu sahəsində müəyyən işlər görülsə də, son zamanlar durğunluq müşahidə olunur, köklü problemlərin həllinə, kordinasiya məsələlərinə zəif diqqət yetirilir".
