AzTU tələbəsi Apple şirkətinin hər il keçirdiyi Swift Student Challenge kodlaşdırma yarışmasının builki qaliblərindən biri olub.
Bu yarışma çox spesifikdir, çünki yarışma yalnız Apple şirkəti məhsulları üçün nəzərdə tutulan Swift proqramlaşdırma dili üzrə keçirilir.
Qalib şirkət tərəfindən rəsmi sertifikat və mükafat qazanıb. Apple bununla bağlı qalibə bildirişlər göndərib və mükafatını poçt vasitəsilə yollayıb.
Apple kimi nüfuzlu bir şirkət göndəriş sənədində göndərilən məhsulun mükafat olduğunu qeyd edib.
Hər şey də elə bundan sonra başlayıb.
Qalib tələbə Smart Customs-da simvolik bir gömrük dəyərini qeyd edərək bəyan edib və mükafatı almaq üçün Hava Limanındakı gömrük qurumuna gedib.
Uzun-uzadı gözləmələrdən və araşdırmadan sonra mükafatın gömrük rüsumuna cəlb ediləcəyi bildirilib və gömrükçülər 177 manat gömrük rüsumu və 18 manat saxlama xərci alaraq mükafatı qalibə veriblər.
Xeberler.az məlumat verir ki, məsələyə Azərbaycan İnternet Formunun Prezidenti, ekspert Osman Gündüz münasubət bildirib.
"Mən bildiyim qədər Azərbaycanda bu tip bacarıqlara sahib olanların sayı barmaqla sayıla bilər.
"Belə görünür ki, Dövlət Gömkür Komitəsi (DGK) hələ də hədiyyə və mükafat məsələsinin gömrük tənzimlənməsini qaydaya sala bilməyib".
Osman Gündüz qeyd edib ki, zaman–zaman hədiyyə ilə bağlı da belə problemlər olur. Hətta çox sayda beynəlxalq yarışlarda mükafat qazanan vətəndaşlarımız da zaman-zaman belə problemlə üzləşiblər:
"Amma DGK uzun illərdi ki, beynəlxalq yarışlarda qazanılan mükafatları da hədiyyə kateqoriyasına daxil edib dərhal gömrük rüsumu tələb edir".
Ekspert bildirib ki, bu, doğru bir hal deyil və uzun müddətdir ki, DGK bu problemi həll etməyə təşəbbüs göstərmir, hökumətə təkliflər vermir:
"DGK tez -tez elan edir ki, peşəkar, xaricdə oxuyub gələn kadrları var, gömrükdə süni intellekt və innovasiyalar tətbiq edirlər.
Düşünürəm ki, əgər deyilənlər reallığı əks etdirirsə DGK-da əyləşənlər mükafatı hədiyyədən, hədiyyəni də digər mallardan fərqləndirən ağlabatan bir mexanizm qura bilərlər".
