"Dövlətə məxsus tezlik resurslarından istifadə mexanizmləri necə olmalıdır?
Hazırda bildiyim qədər NRYTN -da telekommunikasiya və İT sektoru üzrə ciddi konseptual sənədlər hazırlanır.
Xatırlayıram ki, Rəşad Nəbiyevin nazir təyinatı ilə əlaqədar Prezident tərəfindən qəbulunda məhz sektorda ədalətli tənzimləmə və effektiv dövlət siyasətinin həyata keçirilməsinə, sektorda səmərəli və rəqabətli fəaliyyət mexanizmlərinin yaradılmasına xüsusi diqqət yetirilmişdi. Fikrimcə sektorun bütün sahələrində ədalətli və effektiv tənzimləmə hazırda ən vacib məsələdir.
Bu sahələrdən birisi də dövlətə məxsus tezlik resurslarından istifadə ilə bağlıdır. Uzun illərdir ki, Nazirlər Kabineti yanında “Generallar Komissiyası” adlanan, Radiotezliklər üzrə Dövlət Komissiyası fəaliyyət göstərir. Qanunvericiliyə görə mülki və digər məqsədlər üçün radiotezlik zolaqları RTDK tərəfindən ayrılır.
Əslində, fəaliyyət göstərir demək də doğru olmazdı. Çünki belə bir fəaliyyət müşahidə olunmur. Abid Şərifov vəzifəsindən azad olunandan sonra indiyədək də bu Komissiya sədrinin kim olması bilinmir. Düşünürəm ki, NRYTN-in yeni rəhbərliyinin dövlətə məxsus olan tezlik resurslarından effektiv və səmərəli istifadə olunması məsələsinə tam yeni yanaşma, beynəlxalq normalara uyğun yanaşma sərgiləməsi doğru olardı.
Uzun illərdi ki, bizdə bu sektor daha çox "hərbi-təhlükəsizlik" istiqamətində formalaşıb. Mülki sektordan heç kimin (NRYT nazirindən başqa) indiyədək bu Komisssiyada üzvlüyü nəzərdə tutulmamışdı. İnkişaf etmiş ölkələrin hamısında, elə keçmiş MDB məkanında da bu tip Komissiyalar çoxdan xeyli dərəcədə “mülkiləşdirilib”.
Fikrimcə, indiki halda, bu Komissiyanın səlahiyyətlərinin NRYTN əsasında formalaşdırılacaq tənzimləyici quruma verilməsi doğru olardı. Dünya təcrübəsində olduğu kimi tezlik resurslarının ayrılmasını tənzimləyici qurumun reallaşdırması, texniki məsələlərin isə Dövlət Radiotezliklər İdarəsi tərəfindən gerçəkləşmsi bu sektorda daha effektiv və səmərəli fəaliyyətə kömək edərdi.
Hazırda, düşünürəm ki, daha bir problem, ölkə üzrə efir tezliklərindən səmərəli istifadə ilə bağlıdır. Bu problemin həlli həm büdcəyə əlavə vəsaitlərin toplanması,TV-lər rəqəmsala keçdikdən sonra sərbəstləşən məhdud tezlik resurslarına əlçatanlıq və həm də infromasiya təhlükəsizliyi baxımından mühüm əhəmiyyət kəsb edir.
NRYTN-in yeni tənzimləmə mexanizmlərində efir tezliklərindən effektiv və səmərəli istifadə olunması ilə bağlı məqamlar mütləq nəzərdə tutulmalıdır".
