Ekspert: Təhsil sahəsində İT statistika necədir ?

16-09-2019 13:51

Xeberler.az bildirir ki, 2019/2020 –ci dərs ilinin başlanması ilə bağlı bir sıra statistik rəqəmlər dərc olunub. Bu statistik rəqəmlər neçə nəfərin məktəbi bitirməsi, neçə yeni məktəb tikilməsi, neçə nəfərin 1-ci sinfə daxil olması və s . haqqında olur.

Məsələyə Azərbaycan İnternet Formunun Prezidenti, ekspert Osman Gündüz münasibət bildirib:

"Uzun müddətdir ki, təhsilin informasiyalaşması ilə bağlı dövlət proqramı qəbul edilmir.
Bu səbəbdən də təhsildə İKT-nin tətbiqi ilə bağlı işlər kompleks xarakter daşımır, sadəcə harasa Təhsil Nazirliyinin daxili imkanları və sponsorların dəstəyi ilə müəyyən sayda kompüterlər verilir, hardasa spontan təlimlər keçirilir, kimlərsə müəyyən elektron resurslar hazırlayır və s.

Sonda isə təhsilin informasiyalaşmasında son məqsəd olan təhsilin keyfiyyətinin yaxşılaşması prosesi ləng gedir.

Son illərdə məktəblərin genişzolaqlı internet təminatı, hər şagirdə düşən kompüterlərin sayı, İT servisin təşkili istiqamətində , təhsildə rəqəmsallaşma sahəsində ciddi problemlər var.

Statistika göstərir ki, məktəblərin 50% -də genişzolaqlı internet yoxdur, ciddi dövlət təminatı olmadığından kompüter parkı köhnəlib və yenilər verilmir, köhnə kompüterlər qarşıya qoyulan tələbləri yerinə yetirmir, İT servis üçün vəsaitlər tapmaq problemə çevrilib və s.

Bu baxımdan düşünürəm ki, Təhsil Nazirliyi, NRYTN cari dərs ilinin başlanması ilə bağlı aşağıdakı statistikanı da açıqlasa yaxşı olardı :

1. Məktəblərin genişzolaqlı internet təminatı ilə bağlı statistika necədir və bu statistika son illərdə necə dəyişib ?
2. Ötən il neçə məktəbə genişzolaqlı internet xətti , o cümlədən fiber-optik xətt çəkmək mümkün olub ?
3. Bu il neçə məktəbdə keyfiyyətli internet təminatı nəzərdə tutulub ?
4. Ötən il neçə məktəbə və hansı sayda kompüter verilib və bu statistika son illərdə neçə dəyişib ?
5. Hər şagirdə düşən kömüterlərin sayı nə qədərdir və son illərdə bu statistika necə dəyişib ?
6. Bu il məktəblərə nə qədər kompüter və İT avadanlığı veriləcək ?
7. Məktəblərin anbarlarında nə qədər KÜR və digər kompüterlər yığılıb qalıb və onların taleyi necə olacaq ?
8. Neçə təhsil müəssisəsində Distant təhsil forması tətbiq edilir ? Bəzi Universietlərdə buna tam hazırlıq olmasına baxmayaraq nə üçün icazə verilmir ?
9. “İnformatika yoxsa Kimya” problemi neçə ildən sonra həll olunacaq ?

Ən vacib və əhəmiyyətli sual isə odur ki, “Təhsil sisteminin informasiyalaşması” ilə bağlı 7 ildir müzakirə olunan Dövlət Proqramı nə zaman qəbul ediləcək“ ?

ŞƏRHLƏR