Avropa elm və təhsil şəbəkəsinin üzvü olan AzScienceNet şəbəkəsindən bəzi universitetlərimizin ümumiyyətlə xəbəri yoxdur
Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.
"Bu gün Bakıda “5-ci Şərq Tərəfdaşlığı E-infrastrukturlar Konfransı” keçirilir.
Konfrans Avropanın Elm və Təhsil Şəbəkəsi - GEANT Assosiasiyasının təşəbbüsü və koordinasiyası ilə həyata keçirilən, Şərq Tərəfdaşlığı ölkələrini əhatə edən “EaPConnect” (‘EU4Digital: Connecting Research and Education Communities) layihəsi çərçivəsində reallaşıb.
EaPConnect layihəsi Şərq Tərəfdaşlığı ölkələrini əhatə edən elektron elm infrastrukturunun yaradılması və bu ölkələrdə fəaliyyət göstərən alim, müəllim heyəti, eləcə də tələbələrin genişzolaqlı internet şəbəkəsinə çıxışının təmin edilməsini nəzərdə tutur.
Düşünürəm ki, faydalı bir tədbirdir , bu tip layihələr bizim alimlərin və elm mühitinin Avropaya inteqrasiyası və Avropanın rəqəmsal resurslarından daha səmərəli istifadə edilməsi sahəsində mühüm əhəmiyyət kəsb edir.
Bununla belə, bu istiqamətdə müəyyən addımlar atılsa da, Avropa resurslarından istifadə sahəsindəki vəziyyəti qənaətbəxş də hesab etmək olmaz.
Azərbaycan GEANT Assosiasiyasında ETN-nin İnformasiya Texnologiyaları İnstitutunun AzScienceNet elm-kompüter şəbəkəsi vasitəsi ilə təmsil olunur.
AzScienceNet şəbəkəsi Data Mərkəz, İnternet xidmətləri, Şəbəkə təhlükəsizliyi və AzScienceCERT kimi strukturlara malikdir.
AzScienceNet 2015-ci ildən Avropanın EaPConnect layihəsində iştirak edir və oradan dəstəklənir. Hazırda bu şəbəkə 3Gb/s internet trafikə sahibdir və onun xeyli hissəsi, təxminən 2Gb/s trafik AzEduNet Təhsil şəbəkəsinə ötürülür.
Amma maraqlıdır ki, hazırda ölkə üzrə elmi müəssisələrinin yalnız 33%-i, ali təhsil müəssisələrinin isə yalnız 42%-i AzScienceNet-in internet trafikindən istifadə edir.
Yəni, bu o deməkdir ki, elm və təhsil şəbəkəmizin heç yarısı bu sistemə qoşulmayıb.
Düşünürəm ki , ölkəmizin elm və təhsil mühitinim EaPConnect layihəsinin və AzScienceNet-in imkanlarından istifadəsini genişləndirmək olduqca vacibdir. İTİ və AzScienceNet rəhbərliyi bu şəbəkənin imkanları, mövcud rəqəmsal xidmətlərlə bağlı məlumatlandırmanı gücləndirməli, milli elm və təhsil mühitinin bu resursdan daha çox faydalanmasına diqqəti artırmalıdır. Maraqlı məqam odur ki, bizim bəzi universitetlərimizin bu layihələrdən ümumiyyətlə xəbərləri belə yoxdur.
Elə konfransda söhbətləşdiyim bəzi rektorlar da Avropa tərəfindən bu layihəyə ayrılan resurslardan, vəsaitlərdən və ümumiyyətlə bu layihədən xəbərsiz olduqlarını bildirirdilər. Konfransda maraqlı təkliflər də olub.
Çıxış edən İTİ-nin Baş direktoru, Akademik Rasim Əliquliyev də layihənin imkanlarının genişləndirilməsi, Azərbaycanın elm və təhsil mühitinin Avropaya inteqrasiyasının vacibliyindən danışaraq bu istiqamətində təkliflər verib".
