Ekspertlər 2015-ci il üçün İT bazarının əsas tendensiyalarını açıqladı

20-02-2015 / 11:44

International Data Corporation (IDC) analitik şirkəti 2015-ci il üçün əsas texnoloji tendensiyaların siyahısını tərtib edib.

Xəbərlər-in verdiyi məlumata görə, onların sırasında böyük ekranlı smartfonlar (fabletlər), Əşyaların interneti (Internet of Things, IoT), 3D çap və s. yer alıb.
 
Ekspertlərin proqnozlarına görə, Çin iqtisadiyyatının artım tempinin zəifləməsinə baxmayaraq ölkədə informasiya texnologiyaları (İT) bazarı artım nümayiş etdirəcək. Məsələn, Çində 500 milyon smartfonun satılacağı gözlənilir ki, bu da ABŞ-da satılacaq smartfonların sayından 3 dəfə çoxdur və nəzərdə tutulan dünya həcminin üçdə bir hissəsinə uyğundur. Mobil sənaye ilə yanaşı, Çində elektron ticarət və “bulud” texnologiyaları biznesi genişlənir.
 
Mütəxəssislərin proqnozlarına görə, dünya smartfon bazarının artımı əsas etibarilə böyük ekranlı qurğuların populyarlığından asılı olacaq. 2014-cü ildə bu qurğuların satılmış smartfonların ümumi həcmində payı 11 faiz təşkil edib, bu il isə 18 faizədək artacağı gözlənilir. Bildirilir ki, mobil qurğuların ümumi satış həcmi 484 milyard dollara çatmaqla İT sahəsinin artımına 40 faiz əlavə edəcək.
 
Daha bir texnoloji tendensiya kimi IDC nümayəndələri Əşyaların interneti bazarının inkişafını hesab edirlər. Analitiklərin qiymətləndirməsinə görə, 2015-ci ildə Əşyaların internetinə ümumdünya xərcləri 1,7 trilyon dolları ötəcək ki, bu da bir il əvvəlki göstəricidən 14 faiz çoxdur. 2020-ci ilədək bazar həcminin 3 trilyon dollara çatacağı, internet şəbəkəsinə qoşulan qurğuların sayının iki dəfə artaraq 30 milyarda yüksələcəyi gözlənilir.
 
Ekspertlər həmçinin cari ilin yekunları üzrə iritutumlu məlumatlar (Big Data) və onların analizi üçün alətlər bazarında 125 milyard dollaradək artım proqnozlaşdırırlar. Analitik məhsullara xərclər üç dəfə artacaq ki, bunu da IDC mütəxəssisləri son iki ildə bəşəriyyətin bu vaxtadək hasil etdiyi rəqəmli informasiyadan daha çox informasiya hasil etməsini nəzərə almaqla təəccüblü hesab etmirlər.    
Məlumat emalı üçün getdikcə daha çox BULUD servislərindən istifadə edilir. Analitiklərin proqnozuna görə, 2016-cı ilədək hesablama maşınlarının təxminən yarısı və saxlanılan məlumatların həcminin 70 faizi BULUD məlumat emalı mərkəzlərində yerləşdiriləcək. Cari ildə ekspertlər bu bazarda bir neçə iri sazişin imzalanmasını və şirkətlərin satın alınmasını proqnozlaşdırırlar.
 
Dünya texnoloji sənayesində sonuncu əhəmiyyətli tendensiya kimi IDC təmsilçiləri biometriya və üçölçülü çap texnologiyalarının inkişafını qeyd edirlər. Analitiklərin proqnozuna görə, 2015-ci ildə mobil qurğuların 15 faizi biometrik funksiyalarla təchiz ediləcək, beş ildən sonra bu pay göstəricisi 50 faizədək artacaq. 3D printerlər bazarında mədaxilin 27 faiz - 3,4 milyard dollaradək artacağı gözlənilir.

 

Xeberler.az


ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.