E - HÖKUMƏT

Azərbaycanda hamilə qadınlara sistemli nəzarət etmək üçün vahid elektron registrin yaradılması nəzərdə tutulub.

Xəbərlər-in verdiyi məlumata görə, registrin yaradılması "Ana və uşaqların sağlamlığının yaxşılaşdırılmasına dair 2014-2020-ci illər üçün Dövlət Proqramı"nın həyata keçirilməsi işləri üzrə Səhiyyə Nazirliyinin Tədbirlər Planında yer alıb.

Hamilə qadınların elektron reyestri "Vaksinlər və İmmunlaşdırma üzrə Qlobal Alyansın (VİQA) dəstəyi ilə "Azərbaycanda səhiyyə sisteminin gücləndirilməsi" layihəsi çərçivəsində hazırlanır.

Bununla əlaqədar keçirilən seminarda Səhiyyə Nazirliyinin İctimai Səhiyyə və İslahatlar Mərkəzinin direktoru Ceyhun Məmmədov bildirib ki, ana və uşaq sağlamlığı xidmətlərinin daha keyfiyyətli monitorinqi üçün səhiyyə məlumat sisteminin gücləndirilməsi məqsədilə layihə çərçivəsində bir sıra işlər görülüb, "Uşağın immunizasiya pasportu" elektron modulu təkmilləşdirilib, 103 və 106 formalarının proqram təminatı yeniləşdirilib, hamilə qadınların elektron reyestri yaradılıb.

Səhiyyə Nazirliyinin nümayəndəsi Təhminə Tağızadə isə qeyd edib ki, hamilələrin reyestri – hamilənin qadın məsləhətxanasında qeydiyyatdan keçdiyi vaxtdan hamiləliyin sonuna qədər olan vəziyyəti barədə vacib məlumatların toplanıldığı, qeydə alındığı və saxlanıldığı bazadır.

Elmi Tədqiqat Mamalıq və Ginekologiya İnstitutunun elmi katibi Leyla Məmmədova deyib ki, ölkəmizdə ana və uşaq sağlamlığının qorunması istiqamətində bir sıra sənədlər, konsepsiyalar və klinik protokollar hazırlanıb. Görülən tədbirlər sayəsində Azərbaycanda 2006-cı illə müqayisədə ana ölümü üzrə göstəricilər 3 dəfə azalıb.

Xeberler.az