İnnovasiya və Rəqəmsal İnkişaf Agentliyində (İRİA) son dövrlər müşahidə olunan kadr dəyişiklikləri ictimai müzakirələrə səbəb olub.
Xeberler.az bildirir ki, bu barədə Azərbaycan İnternet Forumunun prezidenti, ekspert Osman Gündüz sosial media hesabında paylaşım edib.
Onun sözlərinə görə, qısa müddət ərzində agentlikdən xeyli sayda peşəkar və ixtisaslı əməkdaş, o cümlədən departament rəhbərləri ayrılıb. Bildirilib ki, bəzi hallarda əməkdaşların öz istəkləri ilə deyil, ərizələrinin alınması ilə işdən uzaqlaşdırıldığı qeyd olunur.
Ekspert iddia edir ki, ölkədə və beynəlxalq səviyyədə tanınan mütəxəssislərdən biri, İRİA-nın Data İdarəetməsi Departamentinin rəhbəri Kamran Ağayev də vəzifəsindən istefa verib.
Paylaşımda o da vurğulanır ki, bir neçə gün əvvəl qurumun HR departamentinə yeni rəhbər təyin edilib. Bundan əvvəl isə agentliyin sədr müavini vəzifəsində çalışmış Rəşad Xalıqov da işindən ayrılıb.
Osman Gündüz hesab edir ki, agentlikdə baş verən bu proseslər təkcə kadr dəyişiklikləri ilə məhdudlaşmır və daha geniş idarəetmə və strateji məsələlərdən xəbər verir. Onun fikrincə, ölkədə innovasiya və startap ekosistemində son dövrlər durğunluq müşahidə olunur, vençur maliyyələşmə mexanizmləri isə yetərincə effektiv qurulmayıb.
Ekspert əlavə edib ki, texnopark və İKT sahəsində güzəştlərlə bağlı qərarların icrasında da problemlər mövcuddur və bu, ekosistemin inkişafına gözlənilən təsiri göstərməyib.
Qeyd olunub ki, Fərid Osmanovun İRİA-ya rəhbər təyinatından bir il keçməsinə baxmayaraq, rəqəmsal transformasiya sahəsində müəyyən irəliləyişlər olsa da, innovasiya və startap mühitində ciddi nəticələr hələ də müşahidə olunmur.
Ekspertin fikrincə, əgər qurumda davamlı şəkildə kadr itkisi baş verir və paralel olaraq ölçülə bilən nəticələr ortaya qoyulmursa, bu, strateji fokus, idarəetmə modeli və prioritetlərlə bağlı problemlərin mövcudluğuna işarə edir.
Sonda vurğulanıb ki, İRİA ölkənin innovasiya siyasətində əsas qurumlardan biri olduğundan, burada baş verən proseslər bütövlükdə Azərbaycanın texnoloji inkişaf tempinə təsir edə bilər.
