Azərbaycan Milli Elmlər Akademiyasında (AMEA) “Elm günü” münasibətilə tədbir keçirilib.
Xeberler.az bildirir ki, tədbirdə çıxış edən AMEA-nın prezidenti İsa Həbibbəyli bildirib ki, “Elm günü”nün qeyd olunması ölkədə elmə və alimlərə verilən yüksək dəyərin göstəricisidir. O vurğulayıb ki, Prezident İlham Əliyevin Akademiyanın 80 illik yubileyindəki çıxışı Azərbaycanda elmin inkişafı üçün yeni mərhələnin əsasını qoyub.
Akademiya rəhbəri qeyd edib ki, dövlət başçısının tapşırıqları əsasında Azərbaycan dili və tarixi ilə bağlı tədqiqatlar genişləndirilib, dilin linqvistik korpusunun yaradılması, orfoqrafiya və orfoepiya lüğətlərinin hazırlanması istiqamətində mühüm işlər görülüb.
Bildirilib ki, hazırda 15 cildlik “Azərbaycan tarixi” üzərində iş aparılır, eyni zamanda müstəqillik dövrünü əhatə edən 3 cildin hazırlanması yekunlaşmaq üzrədir. “Azərbaycan ədəbiyyatı tarixi”nin isə artıq 7 cildi çap olunub.
İsa Həbibbəyli çıxışında rəqəmsallaşma və süni intellektin Akademiyada aparılan islahatların əsas istiqamətlərindən biri olduğunu diqqətə çatdırıb. Onun sözlərinə görə, “Elektron Akademiya” çərçivəsində elektron arxitektura formalaşdırılıb, institutlarda rəqəmsal elm və süni intellekt bölmələri yaradılıb.
O, həmçinin bildirib ki, Akademiyada struktur islahatları çərçivəsində son 3 ildə 54 yeni şöbə və sektor yaradılıb, beynəlxalq əməkdaşlıq genişlənib və bir sıra nüfuzlu beynəlxalq elmi təşkilatlara üzvlük təmin olunub.
AMEA rəhbəri əlavə edib ki, hazırda Akademiyada elmi fəaliyyətin qiymətləndirilməsi üçün yeni model hazırlanır və rəqəmsal inkişaf cəmiyyətinin tələblərinə uyğun islahatlar davam etdirilir.
Sonda vurğulanıb ki, Azərbaycan alimləri ölkənin inkişafı naminə elmi fəaliyyətlərini bundan sonra da davam etdirəcəklər.
