QANUNVERİCİLİK

Xeberler.az bildirir ki, bir müddət öncə Prezident dövlət idarəçiliyinin təkmilləşdirilməsi ilə bağlı bəzi tədbirlər haqqında sərəncamlar imzalayıb, bəzi dövlət qurumları ləğv edilib, bəziləri də yenidən yaradılıb.

Yeni qurumlardan biri də Antiinhisar və İstehlak Bazarına Nəzarət Dövlət Agentliyidir.
Əvvəllər İqtisadiyyat nazirliyi yanında Dövlət Xidməti olaraq fəlaliyyət göstərən qurum artıq mərkəzi icra orqanı olaraq fəaliyyət göstərəcək.

Qeyd edək ki, sözü gedən qurumun səlahiyyətlərinə daha əvvəl ləğv edilmiş, Standartlaşdırma Metrologiya və Patent üzrə Dövlət Komitəsinin bəzi səlahiyyətləri də verilib. Bura texniki tənzimləmə, standartlaşdırma, uyğunluğun qiymətləndirilməsi, akkreditasiya və keyfiyyətin idarə edilməsi aiddir.

Həmçinin, “Azərbaycan Metrologiya İnstitutu”, “Azərbaycan Standartlaşdırma İnstitutu” və “Azərbaycan Akkreditasiya Mərkəzi” publik hüquqi şəxs də yeni yaradılmış Dövlət Agentliyinin tərkibində olacaq.

Azərbaycan İnternet Forumunun prezidenti Osman Gündüz bu dəyişikliklə bağlı açıqlama verib: "Görünür ki, yeni qurum xeyli səlahiyyətlərə malik olacaq. Düşünürəm ki, səlahiyyətləri və vəzifələri baxımından kifayət qədər ciddi və strateji əhəmiyyət kəsb edən qurumdur. 

Xüsusilə də ölkədə prioritet olan rəqabətli mühitin formalaşması, haqsız rəqabətin qarşısının alınması , istehlakçıların və eləcə də sahibkarların hüquqlarının qorunması, qeyri-neft sektorunun inkişafı üçün normal mühitin formalaşması bu qurumun fəaliyyətindən çox asılı olacaq.

İstehlakçıların, xüsusilə də rəqəmsal mühitdə istehlakçıların hüquqlarının qorunması sahəsində ciddi problemlər var. Dövlət nəzarəti yetərli olmadığından ümid qalır ictimai nəzarətə. İstehlakçılar, rəqəmsal xidmət istifadəçiləri öz hüquqlarını qorumaq üçün işini gücünü ataraq, sosial mediada xeyli zaman və resurslar sərf edirlər. 
Təbii inhisar subyektləri də hələlik bir çox sahələrdə söz sahibidir. Ümumiyyətlə bizdə bir çox biznes sahəsində dövlətin xüsusi çəkisi yüksəkdir. 

Bu baxımdan düşünürəm ki, yeni yaradılan Antiinhisar və İstehlak Bazarına Nəzarət Dövlət Agentliyinin rəhbərliyi çox prinsipal və “dişli” birsi olmalıdır. Əks halda nəhəng təbii inhisar subyektləri ilə “vuruşa” bilməyəcək.

Məsələn, normalda , ölkənin Azercell kimi ən böyük özəl şirkətinin “dövlətləşməsi”, dövlət şirkətinə çevrilməsi , məhz bu yeni Dövlət Agentliyinin razılığı və icazəsi ilə ola bilərdi.

Və ya sabah hansısa nazirlik başqa bir özəl qurumu dövlət şirkətinə çevirmək istəyəndə, dövlət resursunu bərabər əsaslarla özəlin istifadəsinə vermək istəməyəndə onunla dirəşməli olan məhz bu Dövlət Agentliyinin rəhbəri olacaq.
Kim bunu bacaracaq ?"

Qeyd edək ki, sözü gedən quruma hələlik rəhbər təyin olunmayıb.