SOSİAL MEDIA

Son zamanlar rəqəmsal mühitdə istehlakçı hüquqların pozulması  ilə bağlı tez-tez narazılıqlar müşahidə edilir.

Xüsusilə də mobil xidmətlər, elektron xidmətlərin göstərilməsi sahəsində istehlakçıların hüquqlarının qorunması ilə bağlı vəziyyət pisləşib.

Belə problemin olduğunu Azərbaycan İnternet Forumunun Prezidenti, ekspert Osman Gündüz Xeberler.az-a  təsdiqləyib.

Onun sözlərinə görə, mobil və elektron xidmətlərin keyiyyəti sahəsində istifadəçilərn maraqlarının qorunması da yetərincə təmin olunmur:

“Yəni, istifadəçilərin hesablarından əsassız olaraq pulların silinməsi, istifadəçinin razılığı olmadan onun hansısa xidmətə qoşulması, rouminq zamanı aldadılması, istifadəçinin şəxsi məlumatlarının müxtəlif şirkətlərə qanunsuz olaraq ötürülməsi, elektron formada olan xidmətlərin keyiyyətsizliyi, haqsız rəqabət və s. bu kimi hallar artıb”.

Ekspert hesab edir ki, İnformasiya cəmiyyəti inkişaf etdikcə, “Əşyaların İnterneti” prosesi gücləndikcə, mühit tam olaraq rəqəmsallaşdıqca bu problemlər daha da artacaq:

“Son zamanlar, ölkənin mobil bazarında xüsusi çəkiyə malik Azercell şirkətinin də Nəqliyyat, Rabitə və Yüksək Texnologiyalar Nazirliyi (NRYTN) tərəfindən satın alınacağı ilə bağlı işlərin getdiyini nəzərə alsaq(hələlik adı çəkilən tərəflər bunu təkzib etməyiblər) rəqəmsal mühitdə maraq toqquşmalarının daha da artacağını, elektron mühitdə istifadəçilərin maraqlarının qorunmasının daha da çətinləşəcəyini proqnozlaşdırmaq olar”.

Nə etməli? 

“Qanunvericiliyə görə istehlakçıların hüquqlarının və qanuni maraqlarının qorunması, xidmətlərin keyfiyyətinə və təhlükəsizliyinə dövlət nəzarətinin həyata keçirilməsi İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti cavabdehdir. Lakin müşahidələr göstərir ki bu qurum rəqəmsal mühitdə qarşıya qoyulan vəzifələrin öhdəsindən gəlməkdə çətinlik çəkir. Düşünürəm ki ölkəmizin müasir inkişaf tendensiyasını əsas götürərək, son dövrlərdə dövlət idraəetməsi sahəsində atılan addımlara uyğun olaraq bu sahədə də ciddi islahatlar aparılmalıdır. Fikrimcə, adı çəkilən qurumun vəzifə və səlahiyyətlərinə yenidən baxılması və onun müstəqil, birbaşa prezidentə tabe ola olan dövlət qurumu olaraq fəaliyyət göstərməsi daha doğru addım olardı”.

Osman Gündüz vurğulayıb ki, bütün mobil və elektron xidmətlərlə bağlı vətəndaşların qanuni maraqlarının qorunması üçün bu qurumda vahid bir Qaynar xətt yaratmaq çox faydalı olardı:

“Eyni zamanda ,ümumiyyətlə, rəqəmsal mühitdə istehlakçıların hüquqlarının qorunması ilə bağlı ayrıca bir dövlət xidmətinin yaradılması məsələsi də nəzərdən keçirilə bilər”.

Məltəm Talıbzadə