Müəllimlərin işə qəbul imtahanları necə təşkil olunmalıdır ?

30-07-2019 13:36

Xeberler.az bildirir ki, Müəllimlərin işə qəbulu üzrə müsabiqənin test imtahanı mərhələsi yekunlaşıb. Hazırda düz-səhv cavablar şəxsi kabinetə göndərilib və appelyasiya şikayətlərinə baxılır. İmtahanlar kütləvi xarakter daşıyıb, 16 gün ərzində 41. 288 nəfər imtahan verib. İmtahanlar zamanı 19 ixtisas fənni üzrə ümumilikdə 5.340 sayda test tapşırığından istifadə edilib. 29 test tapşırığında isə texniki səhv aşkarlanıb.

Təhsil Nazirliyi bu mərhələdə şəffaflığın təmin edilməsi, imtahanların uğurla başa çatması üçün bir sıra addımlar atıb. İnfoturlar təşkil edib, ictimai nəzarət imkanları yaratmağa çalışıb. Bununla belə MİQ imtahanlarının ədalətli və şəffaf olması istiqamətində bir xeyli ictimai müzakirələr də aparıldı və bu müzakirələr sosial mediada indi də davam edir.

Məsələyə Azərbaycan İnternet Formunun Prezidenti, ekspert Osman Gündüz münasibət bildirib. Osman Gündüz gələcəkdə bu tip imtahanlara hazırlıq və onun təşkili bağlı bir sıra təkliflər irəli sürüb.

1. Test bankı genişləndirilməli və imtahanlara düşən testlər açıqlanmalıdır.
2. Düz-səhv cavablar dərhal açıqlanmalı və şəxsi kabinetə yərləşdirilməlidir.
3. İmtahandan öncə imtahanlara hazırlıq və kömək məqsədilə onlayn və oflayn formada metodiki vəsaitlər hazırlanmalıdır.
4. Müəllimlərin işə qəbul imtahanlarının proqram təminatı təkmilləşdirilməli, aidiyyati qurumlar və maraqli tərəflərin nümayəndələrinin iştiraki ilə audit olunmalıdır. Auditin nəticələri imtahanlardan öncə açıqlanmalıdır.
5. Proqram təminatına, şəbəkəyə və serverə giriş imkanları, imtahan nəticələrindən ibarət məlumat bazasına giriş səlahiyyətləri ilə bağlı reqlament hazırlanmalı və imtahandan öncə dərc olunmalıdır.
6. İmtahan verənlərin yerləri qabaqcadan nömrələnməlidir və bu haqda əvvəlcədən onlara məlumat verilməlidir.
7. İmtahanların regionlarda təşkili üçün imkanlar yaradılmalıdır.
8. Təhsil Nazirliyi maraqlı tərəf olduğundan kütləvi imtahanların keçirilməsində səlahiyyətli dövlət qurumu olan DİM –lə birgə gələcəkdə bu imtahanların daha yüksək səviyyədə, daha effektiv və daha optimal təşkili imkanları müzakirə olunmalıdır.