STARTAP AZƏRBAYCAN

Xeberler.az olaraq bu il Startap Azərbaycan müsabiqəsində iddiaçı olan layihələrlə bağlı yazıları davam etdiririk. 

Bundan öncə Allrent , Təbii. AL,  GoTrip.az, WebCamTV.WebCam  Edu-Map.org və  digər 7 layihə barədə  startapları barədə məlumat vermişdik.

Startap Azərbaycan-da qeydiyyatdan keçən layihələrdən biri isə OfferBee startapdır.

OfferBee bütün brendlərin yenilikləri haqqında məlumatları (endirim, kampaniya, vakansiya, xüsusi promo aksiyalar və s.) bir arada cəmləyən proqramdır.

OfferBee barədə daha ətraflı layihə rəhbəri Seymur Kazımzadə ilə söhbət etdik.

Təsisçi deyib ki, OfferBee ilkin mərhələ olaraq Azərbaycan (Bakı) və Rusiya (Moskva) bazarı üçün nəzərdə tutulub.

Onun sözlərinə görə, layihə başlamazdan öncə bazar araşdırması aparılıb:

“Gələcəkdə layihənin yaxın regionlarda da fəaliyyəti  nəzərdə tutulub. Bununla bağlı Azərbaycanda və Rusiyada bazar araşdırılması aparılıb, oxşar xidmətin olmadığı müəyyən olunub.

Belə ki, ictimaiyyətin marağında olan müxtəlif sahəyə aid brendlərin yeniliklərinin (endirim, vakansiya, kampaniya və s.) hamısının bir arada olduğu platforma mövcud deyil. Hər hansı yenilikləri öyrənmək üçün hər bir brendin internet səhifəsinə, Facebook səhifəsinə və s. müraciət etmək məcburiyyətində qalırıq. Bu isə əlavə vaxt və enerji itkisidir. Yaratdığımız məhsul həm də məşhur markalar üçün rahatlıq yaradır. Beləliklə, brendlər öz hədəf kütlələrinə birbaşa çıxış əldə edə bilir və yeniliklərini mətn, şəkil və video kimi vasitələrdən istifadə edərək ən effektiv formada çatdıra bilir”.

Seymur Kazımzadə deyib ki, platforma həm Android, həm də iOS üçün istifadəyə verilib. Bir aydan çoxdur istifadəyə təqdim edilən mobil tətbiqlərdən 5000-dən çox  yükləmə olub.

O qeyd edib ki,  artıq bir neçə  əməkdaşlıq müqaviləsi də  imzalanıb və bəzi brendlərlə OfferBee istifadəçiləri üçün özəl endirim təklifi ilə bağlı razılaşma əldə edilib.

Seymur Kazımzadə Startap Azərbaycan-dan gözləntiləri barədə də danışıb:

“Müsabiqədən əsas gözləntimiz ekspertlərin rəyi əsasında  öz  zəif tərəflərimizi görüb, bunun üzərində çalışıb, layihəni  daha təkmil hala gətirməkdir. Bundan başqa, müsabiqədə  iştirak bizə əlaqələrimizi genişləndirməyə yardım edəcək. Və əlbəttə ki, hamı kimi biz də qalib olmaq istəyirik (gülür)”.