İNNOVASİYA VƏ STARTAP

Xeberler.az olaraq bu il Startap Azərbaycan müsabiqəsində iddiaçı olan layihələrlə bağlı yazıları davam etdiririk. 

Bundan öncə Allrent , Təbii. AL,  GoTrip.az, WebCamTV.WebCam  Edu-Map.org OfferBee və  digər 7 layihə barədə  startapları barədə məlumat vermişdik.

Startap Azərbaycan-da qeydiyyatdan keçən layihələrdən biri isə Qənaət startapıdır.

Qənaət insanlara öz xərclərini ən doğru formada müəyyənləşdirmələrinə yardım etmək üçün yaradılan platformadır.

Belə ki, bu layihə nəticəsində bir çox insanlar xərclərinə düzgün formada nəzarət etmək və saytın, mobil tətbiqin köməkliyi ilə asan formada öz gəlirlərinə qənaət etmək imkanına sahib olacaq.

Layihə rəhbəri Tural Səmədov Xeberler.az-a Qənaət barədə daha ətraflı məlumat verib:

“Məsələn, ailədə 4 nəfər var və ailəyə aylıq olaraq 300 AZN pul daxil olur. Bu 300 AZN-dən müəyyən bir hissəsini aylıq olaraq yemək-içmək və digər zəruri xərclərə yönəltmək üçün bu sayta və tətbiqə daxil olub müvafiq axtarış böməsində məbləği, ailə üzvlərinin sayını və əlavə olaraq, istəyə uyğun bölmələri (vegeteranlar, şəkərli diabet və s.) daxil edirsiniz. Bununla da həmin şəxsə bir ay ərzində qeyd etdiyi məbləğə uyğun olaraq gündəlik normal koloridən az olmamaq şərtilə yemək-içmək üçün ərzaqlar və aylıq digər zəruri malların siyahısı verilir.

Yəni, verilmiş qiymətə uyğun olaraq bütün mallar və qiymətlər xidmət tərəfindən bir neçə saniyə içərisində incəliklə hesablanır və itkiyə yol verilmir. Siyahıda qeyd edilən ərzaqların hər birindən neçə cür yeməklərin hazırlanması, onların saxlanma şəraiti və s. haqqında da məlumatlar yazılı və ya video şəklində  təqdim olunur. Alıcı telefonuna gəlmiş məktubda qeyd edilmiş ID kodu ilə əraziyə uyğun əməkdaşlıq edəcəyimiz marketlərə yaxınlaşaraq, göstərilmiş qiymətlərlə məhsulları əldə edə biləcək”.

Tural Səmədov deyib ki, Qənaət-in saytı hələki demo versiyadadır və layihənin hazırlanması istiqamətində işlər davam edir.

Təsisçi Startap Azərbaycan-dan layihəyə maliyyə cəlb olunması və təşkilati dəstək istiqamətində gözləntilərinin çox olduğunu  deyib:

“Biz insanlara daha çox qənaət etməyə, xərclərini və vaxtını səmərəli istifadə etməsi üçün şərait yarada biləcək bir xidmət yaradırıq. Bu baxımdan fikirləşirik ki, Startap Azərbaycan və investorlar ən uğurlu layihələrdən biri olacaq Qənaət-i seçməklə yanılmayacaqlar”.

Tural Səmədov layihənin mobil tətbiqləri ilə bağlı işlərin sonuncu mərhələdə olduğunu bildirib:

“Əsas vacib iş saytdan öncəki işlərdir. Bu mərhələ də  5 ay vaxt alacaq. Biz hələlik bu işlərin nədən ibarət olacağını açıqlamaq istəmirik”.  

Məltəm Talıbzadə