STARTAP AZƏRBAYCAN

Azərbaycanın startap eksosistemində  yaxından tanıdığımız , “Startap Azərbaycan” –nın münsif  nümayəndəsi Coşqun Kərimov ölkəmizdə bir ilkə imza atacaq  “KVAN” kitabını yazıb.

Əvvəlcə onu deyim ki, startap layihələri üzərində çalışan əksər şəxslər yazmağa o qədər də meyilli olmur. Müşahidələrimiz göstərir ki, İT sahəsi ilə məşğul olan  mütəxəssislərin  həm nəzəri, həm də təcrübi bilikləri çox yüksək olsa da, bunları fikirdən kağıza tökməyə sözün əsl mənasında tənbəllik edirlər.

Həmişə düşünürəm ki, jurnalistlər hər kəsin də görə biləcəyi məqamları yazır. Yəni, sadəcə bunun cəmiyyətə çatıdırlmasında (doğru, qərəzsiz, ətraflı) vasitəçi rolunu oynayır.  Amma bu işin içində olan insanların bu məqamları öz təcrübəsi ilə yazması cəmiyyətə  daha böyük təsir edib, nələrisə dəyişə bilər.

Coşqun Kərimovun 30 yaşı var. Ailəlidir və 2 övladı var. Qafqaz Universitetinin İngilis dili və Ədəbiyyatı üzrə filoloq ixtisasını bitirib. 27 yaşımda ilk şirkətini təsis edib. Bu yaşına qədər o, Turizm və Müştəri xidmətləri sektorunda işləyib.  Müştəri xidmətləri, satış və təqdimat bacarıqları üzrə (7+) illik təlimçilik təcrübəsi var. Dünyanın top 5 təlimçisindən biri olan Brian Tracy-dən (satış, natiqlik və vaxtın idarə edilməsiylə bağlı) master klass almıb. Azercell MMC-də təlimçi mütəxəssis, VitalCV və Manads lahiyələrinin həmtəsisçisi olub.

Hazırda ingilis dilində ünsiyyət və şəxsi inkişaf klubu olan GR8-in həmtəsisçisidir.

İndi isə hamımıza maraqlı gələn “KVAN”-dan danışacam.

Kitabın “müəllif hədiyyəsi” olan ilk 65 səhifəsini PDF formada oxudum.

Bəli, kitab çapdan çıxmamış oxudum.  Xatırladaq ki, ABŞ-da bu təcrübə var. Belə ki, kitabı çap etməzdən əvvəl müəllif birbaşa sosial media platformaları üzərindən paylaşır, kitabını təqdim edir. Oxucuların rəyləri və dəstəyini alaraq çap mərhələsini həyata keçirir. Məsələn, məşhur Kickstarter və LeanPub  platformaları  üzərindən belə fəaliyyətlər həyata keçirilir.

Motivasiya ilə dolu olan kitabda siz həm özünüzü, həm Coşqun Kərimovu, həm də dünyaca tanınmış yazıçıları, rəssamları, musiqiçiləri, idmançıları çox fərqli prizmadan görəcək və tanıyacaqsınız.

Kitabda həmin insanlarla birgə maraqlı səyahətə çıxacaqsınız. Coşqun bəyin də kitabda qeyd etdiyi kimi, özünüz də “3D Səyahətinizə”  başlayacaqsınız.

“KVAN”-da daxili motivasiya üçün 7 mühüm sualı müəlliflə birgə cavablandırırsınız. Kitabın başqa kitablardan fərqi odur ki, sonuncu fəsli məhz oxucular yazır. Bu addımı atmaqla həyatınıza sahib çıxmış olursunuz.

Bir sözlə, tamaşaçı olmaq əvəzinə aktiv ifaçı olursunuz.

Kitabı oxuyanda bəlkə də deyəcəksiniz ki, “aaa... mən də belə idim”, “bu nə hadisələrdir ki, mən bundan da çətinlərini, çıxılmaz olanını yaşamışam, amma heç yazmamışam”. Bəli, siz yazmayıbsınız. Siz risk etməyibsiniz. Mən də risk etməmişəm . Amma Coşqun Kərimov risk edib, yaşayıb və ən əsas bunu yazıb. 

Kitabını oxuduqdan sonra Coşqun Kərimovla elə dünən oturub ətraflı söhbət etdik.

Coşqun Kərimovun sözlərinə görə, insanların daxilindəki şübhələr, narahatlıqlar və qorxular onları etmək istədiklərindən uzaqlaşdırır.  Həm də cəmiyyətin basqısı- “sən bunu bacara bilməzsən, səndən əvvəlkilər heç bacarmadı, sən necə  bacaracaqsan? “ kimi   yanaşmaları da insanların risk edib, uğur qazanmasında ciddi maneə törədir.

“Bu gün cəmiyyətdə depsessiya ilə yaşayan  insan çoxdur. Belə insanlar olduqları sahədə özlərini xoşbəxt hiss etmir. İşdə olarkən dəqiqələri sayır ki, canını qurtarıb evə getsin. Onların fikirləri əslində  olmaq istədikləri işdədir.”

Kitabı çapdan öncә sifariş etmiş hәr kәsin adı kitabın arxasında “KVAN-a həyat vermişlər siyahısında” qeyd edilir.

Hazırda ilk 65-səhifəni əldə etmiş oxucuların dəstəyi ilə 500 kitablıq tirajın çapı üçün məbləğ toplanıb.

Kampaniya çərçivəsində www.kitabsiz.az saytına yüklənilmiş PDF-i saytın istifadəçiləri tərəfindən 760+ dəfə yüklənib.

Üstəlik kampaniya çərçivəsində yeni ildə 250+ nəfər də “65 səhifəni” öz mail ünvanlarına göndərərək əldə edib.

Kitabı əldə etmək istəsəniz, www.kvanoxu.com daxil olun və kitabla bağlı fikirləri #kvanoxu həştəqindən izləyin.

Məltəm Talıbzadə