İnnovasiya və Rəqəmsal İnkişaf Agentliyi ötən gün yeni elektron hökumət Super Portalının konsepsiyasını təqdim edib.
Xatırladıram ki, indiyədək bizdə "e-Gov", "MyGov", "DXR.AZ" və regional hökumət portalı "rih.gov.az" resursları vardı.
Gizli deyil ki, bu resurslar rəqəmsal hokumət quruculuğu baxımından effektiv və çevik resurslar deyil, tələbatı ödəmir, vətəndaşlar arasında populyar deyil. eGovdakı xidmətlərin də bir çoxu da aktiv deyildi. Bu rəsmi resurslarda olan rəsmi məlumatlar isə rəsmi sənəd statusunda deyildi, sadəcə məlumat idi. İndi İRİA bu resurslardan 3-nün, e-Gov, MyGov və rih.gov.az əsasında yeni, vahid bir elektron hökumət portalı- Super Portal və mobil versiyası (Rəqəmsal cüzdan ) təklif edir. Resurs tam rəqəmsal olacaq. İlkin mərhələdə 10 sənədin (şəxsiyyət vəsiqəsi, sürücülük vəsiqəsi, nigah şəhadətnaməsi, diplomlar və s.) tam rəqəmsal sənədə keçirilməsi nəzərdə tutulub. Data əsaslı xidmət olacaq.
Yəni, bu resursa daxil olaraq təqdim edilən məlumat sadəcə məlumat olmayacaq, rəsmi sənəd statusu qazanacaq. Bununla da bütün sənədlərimiz telefonda-cibimizdə olacaq.
Vətəndaş hökumətin göndərdiyi bildirişləri qəbul edə biləcək. Vətəndaş fərdi məlumatlarına nəzarət edəcək. Super Portalda dövlətin bütün elektron xidmətlərinin olması nəzərdə tutulur. İRİA açıqlayıb ki, bu istiqamətdə bir çox mərkəzi qurumlarla real əməkdaşlıqlar var.
Düşünürəm ki, doğru və faydalı bir yanaşmadır. Bununla da vətəndaşlar rəqəmsal hökumətin üstünlüklərindən daha effektiv bəhrələnə biləcək, vətəhdaş-hökumət münasibətləri daha rahat və çevik olacaq. Ölkədə rəqəmsal transformasiya xeyli sürətlənəcək. İRİA cari ilin sonuna Super Portalın ilkin versiyasını istifadəyə verməyi nəzərdə tutub.
Yeri gəlmişkən, İRİA bir müddət öncə dövlət qurumları arasında elektron sənəd dövriyyəsi sistemi ilə bağlı təqdim etdiyi modelin də istifadəyə verilməsi istiqamətində işlərin başa çatmaqda olduğunu bildirib.
Osman Gündüz,
Azərbaycan İnternet Forumunun Prezidenti
