Son illərdə hökumət dövlət sektorunda, hətta kritik hesab oluna biləcək özəl sektorda da informasiya təhlükəsizliyi və kibertəhlükəsizlik məsələlərinə ciddi diqqət yetirir.
Yeni hüquqi aktlar qəbul edilib, dövlət sektorunda İT təhlükəsizliyə yeni yanaşmalar var və bu perimetrə daxil olan qurumlara daha sərt münasibət sərgilənir.
Fərdi məlumatların qorunması üçün də yeni yanaşmalar var. Amma elə dövlət qurumları var ki, sanki ölkədə baş verənlərin onlara hər hansı aidiyyatı yoxdur.
Baxıram ki, Mədəniyyət Nazirliyi öz strukturlarında işə qəbulla bağlı elan verib.
Hansısa qurumlarda direktor, müavin, müəllim işləmək istəyənlərin fərdi məlumatlarını xarici bir resurs üzərindən,
jotform.com üzərindən olan qeydiyyat forması əsasında qəbul edir.
Əlbətdə bu resurs dayanıqlı ola bilər, hansısa özəl qurum və ya layihələr bundan sərbəst istifadə edə bilər. Amma dövlət qurumu üçün bu tip addımlar yolverilməzdir və ölkədə bu sahədə aparılan işlərlə uzlaşmır.
Gərək Nazirlik öz internet resursu üzərindən normal, təhlükəsiz bir sistem formalaşdırsın. Bunun İT auditini təşkil etsin.
Maraqlıdır ki, bu sahəyə cavabdeh qurumların, RİNN -nin Elektron Təhlükəsizlik Xidmətinin, dövlət sektorunda İT auditlər keçirən Xüsusi Rabitə və İnformasiya Təhlükəsizliyi Dövlət Xidmətinin nəzarətindən çəkinmədən Nazirlik bu addımları rahatca ata bilir. Yeri gəlmişkən, fərdi məlumatların təhlükəsizliyinə cavabdeh olan RİNN-nin ETX qurumuna da yeni təyinat olub.
Güman ki, Mədəniyyət Nazirliyi hazırladığı "jotform" resursu ilə sahəyə cavabdeh olan ETX-in yeni rəhbəri Samir Rəsulov üçün də təbrik sürprizi hazlrlayıb. Ümid edirəm, RİNN və XRİTDX baş verənlərin fərqindədir.
Osman Gündüz,
Azərbaycan İnternet Forumunun prezidenti, ekspert
