Prezidentin fərmanı ilə təsdiqlənən “Tənzimləyici pilot layihələrin həyata keçirilməsi Qaydaları” bu sahədə yeni mərhələnin başlanğıcını qoyur. Belə ki, innovativ və vətəndaşlara birbaşa təsir edən rəqəmsal layihələr artıq birbaşa tətbiq olunmayacaq, əvvəlcə pilot (test) mərhələdən keçəcək.
Xeberler.az bildirir ki, bununla bağlı Azərbaycan İnternet Forumunun prezidenti, ekspert Osman Gündüz fikirlərini bölüşüb.
Ekspert qeyd edib ki, bu qaydalar əsasən süni intellekt, böyük verilənlər (big data), yeni dövlət xidmətləri və vətəndaş məlumatlarına təsir edən rəqəmsal həlləri əhatə edir. Bu isə o deməkdir ki, nazirliklər və digər dövlət qurumları bu tip layihələri müstəqil şəkildə tətbiq edə bilməyəcək və mütləq təsdiq prosedurundan keçməli olacaqlar.
Onun fikrincə, qərarlar Rəqəmsal İnkişaf və Nəqliyyat Nazirliyi tərəfindən işçi qruplar və ekspert rəyləri əsasında veriləcək, təhlükəsizliklə bağlı məsələlərdə isə Xüsusi Rabitə və İnformasiya Təhlükəsizliyi Dövlət Xidməti və Dövlət Təhlükəsizliyi Xidməti də prosesə cəlb olunacaq.
Osman Gündüz bildirib ki, bu yanaşmanın müsbət tərəfləri sırasında paralel sistemlərin azalması, risklərin əvvəlcədən yoxlanılması və keyfiyyətə nəzarətin gücləndirilməsi yer alır. Bununla yanaşı, çevikliyin azalması, bürokratik maneələrin artması, innovasiyanın ləngiməsi və qərarların subyektivliyi kimi risklər də mövcuddur.
Ekspert hesab edir ki, düzgün və şəffaf tətbiq olunacağı təqdirdə bu model daha koordinasiyalı və idarə olunan rəqəmsal mühitin formalaşmasına gətirib çıxara bilər. Əks halda isə innovasiya tempinin zəifləməsi ehtimalı yüksəkdir.
O, həmçinin qeyd edib ki, bu proses fonunda Rəqəmsal İnkişaf və Nəqliyyat Nazirliyinin rolu daha da güclənir və qurum təkcə tənzimləyici deyil, həm də rəqəmsal layihələrin icrasında əsas qərarverici mərkəzə çevrilir.
