"Əgər hökumət, başqa qonşu ölkələrdə olduğu kimi, distant təhsilin təşkili üçün zəruri olan texniki-texnoloji təminata büdcədən vəsait ayırmaqda çətinlik çəkirsə bir neçə alternativlər tapmaq olar".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert həmçinin məsələnin həlli ilə bağlı bir neçə təkliflər irəli sürüb:
"Məsələn, imkan yaratmaq olar ki, ortabab vətəndaş normal noutbuku 1500- 2000 manata bizim mağazadan deyil, elektron ticarət yolu ilə -poçtla 500 - 600 $ ödəməklə xarici internet mağazalardan alıb gətirsin.
Həmçinin də, vətəndaş övladının distant təhsili üçün zəruri olan smartfonu da bu
qayda ilə daha ucuz əldə edə bilərdi. Bunun üçün isə hökumət şəxsi məqsəd üçün gətirilən mallara gömrük limitinin müəyyən edilməsi ilə bağlı NK305 saylı qərarına yenidən baxmalıdır.
Fikrimcə, hökumət 20 sentyabrdan qüvvəyə minəcək qərarı ya əvvəlki vəziyyətdə saxlamalı ya da vətəndaşın poçtla gətirə biləcəyi malın məbləğini (limiti) ortabab telefon və ya noutbuk ala biləcək vəziyyətdə (təxminən 700 $ ətrafında) saxlamalıdır".
Osman Gündüzün sözlərinə görə, belə olan halda distantın keyfiyyətli təşkilində hökumətin də yükü xeyli azala bilərdi. Və Nazirlər Kabineti yalnız daha həssas qrupa daxil olan təbəqə üçün texniki-texnoloji təminatı öz üzərinə götürə bilərdi.
"Yeri gəlmişkən, xatırladıram ki , məsələn, Qazaxstan hökuməti bu il distant təhsilin təşkili məqsədilə büdcədən 150 milyon $ vəsait ayırıb. Bizim Təhsil Nazirliyi isə hələlik monitorinq keçirərək, müəllimlərin və şagirdlərin texniki-texnoloji təminatı ilə bağlı yerlərdən aldığı rəqəmlərə, sadəcə baxmaqda davam edir".
