RADİOTEZLİKLƏR

2026-cı ilin yanvar–aprel aylarında İnformasiya Kommunikasiya Texnologiyaları Agentliyinə (İKTA) hüquqi və fiziki şəxslər tərəfindən radio avadanlıqlarının mülki dövriyyəsinə xüsusi icazə alınması məqsədilə 350 müraciət daxil olub.

Xeberler.az məlumat verir ki, daxil olmuş müraciətlər üzrə ümumilikdə 16 237 ədəd müxtəlif marka və model avadanlıqla bağlı qanunvericiliyə uyğun tədbirlər görülüb.

Araşdırmalar nəticəsində 8 539 ədəd radio avadanlığının mülki dövriyyəsinə xüsusi icazə verilib. Eyni zamanda, 96 ədəd avadanlıq üzrə qanunvericiliyin tələblərinə uyğun olmadığı üçün icazənin verilməsindən imtina olunub. İmtina qərarları ilə bağlı müraciət sahiblərinə çatışmazlıqlar barədə ətraflı məlumat təqdim edilib.

Bununla yanaşı, 4 müraciət üzrə xüsusi icazə verilməsi üçün aidiyyəti qurumların rəylərinin təqdim olunması gözlənilir. Aparılmış araşdırmalar nəticəsində isə idxal olunmuş 7 553 ədəd avadanlıq üçün xüsusi icazənin tələb olunmadığı müəyyən edilib və bu barədə müraciət sahibləri məlumatlandırılıb.

Eyni zamanda, üç hüquqi şəxs tərəfindən təqdim olunmuş müraciətlər əsasında aparılan hüquqi və texniki araşdırmalar nəticəsində 284 ədəd müxtəlif radio avadanlığı üzrə verilmiş xüsusi icazələrin ləğv edilməsi barədə qərar qəbul olunub.

Qeyd olunub ki, mülki dövriyyəsi məhdudlaşdırılmış əşyaların tənzimlənməsi istiqamətində inzibati tədbirlər davam etdirilir.

Xatırladaq ki, 2024-cü ilin mart ayından İKTA tərəfindən “Radioelektron vasitələrə verilən icazələr” elektron xidməti istifadəyə verilib ki, bu da müraciətlərin daha operativ və səmərəli cavablandırılmasına şərait yaradır.

Bundan əlavə, 2026-cı ilin ilk 4 ayı ərzində “Lisenziyalar və icazələr haqqında” qanuna əsasən sürətli poçt xidməti ilə bağlı 91 müraciətə baxılıb. Nəticədə 85 ünvan üzrə müraciətlərə müsbət cavab verilib, 6 müraciət üzrə isə mənfi rəy təqdim olunub.

İKTA telekommunikasiya və poçt rabitəsi sahəsində tənzimləyici qurum kimi fəaliyyətini davam etdirərək sahənin inkişafı üçün tədbirlərini davam etdirəcək.