İKTA-nın anlaşılmaz açıqlaması. Milli domenin milli inzibatçısı kimdir, milli inzibatçı səlahiyyətini ona kim verib?
Bu gün İKTA mili domenimizin inzibatçısı ilə görüş haqqında məlumat yayıb.
Dərhal qeyd edim ki, İKTA-nın milli domenlə bağlı, internet ictimaiyyətinin maraq dairəsində olan bir məsələ ilə bağlı bu cür qapalı və spontan bir tədbir keçirməsi heç də xoşagələn hal deyil.
Milli domenlə bağlı illərdir ki, yığılıb qalan problemlər var.
Dəfələrlə bu haqda yazılıb.
Mən bilmirəm İKTA-da əyləşənlər bu problemləri bilirlərmi ?
Milli domenimizin milli inzibatçısının kim olması heç bir hüqüqi-normativ aktda, nə Telekommunikasiya haqqında qanunda, nə Nazirlər Kabinetinin “Milli domen adlarının qeydiyyatı və istifadəsi Qaydalarında”, nə də Nazirliyin sənədlərində yoxdur.
Onda sual yaranır ki, İKTA hansı məntiqlə , hansı prinsiplərlə bu məsələni müzakirə edib, hansı hüquqi əsasla yanaşma sərgilənib?
Açıladığı məlumatlardan görsənir ki, İKTA milli domenin mill təhlükəsizliyimizİn tərkib hissəsi olmasının, milli domenin cəmiyyətin maraq dairəsində olmasının, milli inzibatçının səlahiyyətinin kim tərəfindən müəyyən edilməsinin, milli domenin əsil sahiblərinin kimlər olmasının ümumiyyətlə fərqində deyilmiş.
Düşünürəm ki, İKTA-nın toplantısında öz səlahiyyətləri çərçivəsində XRİTDX, DTX , internet ictimaiyyətinin nümayəndələri, digər maraqlı tərəflər iştirak etməliydi, yuxarıda qeyd olunan məsələlərə aydınlıq gətirilməliydi.
Bu, sıradan bir operator, yaxud provayder məsələsi deyil.
Əgər İKTA-da kimsə buna belə yanaşırsa bu çox qüsurlu yanaşmadır.
İKTA ilk növbədə mövcud hüquqi vəziyyəti aydınlaşdırmalı, burada şəffaf, kollegial, beynəlxalq normalara və yerli qanunvericiliyə uyğun LEGİTİM bir mühit formalaşdırmalıdır.
Uzun illərdən bəri formalaşmış və oturuşmuş, necə deyərlər qaysaq bağlamış bir problemin həllinə yeni yaranan tənzimləyici qurumun belə yanaşması çox təəssüfləndiricidir.
