Onun sözlərinə görə, real tənzimlənmə mexanizmləri olmadığına görə, dünyada internet-biznesin yüksək artım tempi olan seqmentlərindən biri olan elektron ticarətin inkişafı ölkəmizdə hələ də ləngiiyir.
O. Gündüz qeyd edib ki, Azərbaycanda 2012-2014-cü illərdə elektron ticarət sahəsində maraqlı layihələr yaransa da onların inkişafına maneələr var. Əgər bir müddət əvvəl əsas problemlərdən biri istehlakçıların elekton ticarətə maraq göstərməsi, seçdiyi malları internetdən alması idisə, hazırda bu problem tədricən öz həllini tapmaqdadır. Hər il daha çox yerli istehlakçı internet vasitəsilə seçdiyi malları alır.
Amma hazırda yeni bir problem meydana çıxıb – Azərbaycan istehlakçılarının xarici internet-magazalarda alış-veriş etməsi. Elektron ticarətin tənzimlənməsində olan boşluqlar xarici internet-magazalara Azərbaycanın internet-məkanında geniş reklam olunaraq istehlakçıları cəlb etməyə müvəffəq olublar.
“Bəzi xarici internet-magazalar ölkəmizdən olan istehlakçıların rahatlığı üçün hətta öz qiymətlərini Azərbaycan manatı ilə göstərir. Onların Azərbaycan istehlakçılarına satdıqları malların üzərinə vergi ödəmələri və gömrük rüsumları qoyulmadığı üçün bu yolla alınan mallar Azərbaycan qiymətlərindən daha ucuz olur. Bu qiymət fərqinə görə isə milli internet-magazalar rəqabətə dözmür. Çünki milli intenret-magazalar yalnız Azərbaycana rəsmi idxal olunan və vergilər ödənilən malların satışı ilə məşğuldur. Bu isə birbaşa olaraq qiymət fərqi deməkdir”, - deyə İnternet Forumun prezidenti bildirdi.
Osman Gündüz bildirib ki, bütün dünyada elektron ticarət seqmentində dövlətlər öz maraqlarını qorumaqdadır. Effektiv tənzimləmə mexanizmləri Qərbdə artıq məlumdur və sürətlə inkişaf edən elektron ticarət ölkə daxilində fəaliyyət göstərən internet-magaza subyektlərinin maraqları müdafiə olunmaqla inkişaf edir (smartfon.az).
