İNNOVASİYA VƏ STARTAP

Azərbaycanda müxtəlif məkanlar barədə məlumatları özündə toplayan yeni platforma yaradılıb.

Belə ki, Neharada.az saytı və mobil tətbiqi ilə Azərbaycanın şəhər və rayonlarında yerləşən məkanların yerini dəqiq tapmaq, onların göstərdiyi xidmətlər barədə dolğun informasiya əldə etmək mümkündür.

Layihənin rəhbəri isə Rəşad Əliyevdir.

Xeberler.az olaraq yeni platforma ilə bağlı R. Əliyevlə ətraflı söhbət etdik.

Layihə rəhbəri qeyd edib ki, uzun zamandır bu ideyanı həyata keçirmək üzərində fikirləşir. Artıq istifadəyə təqdim edilən Neharada.az bazara özü ilə bir neçə yenilik gətirib.

Məlum olduğu kimi, dünyada və Azərbaycanda buna bənzər çox sayda layihələr, platformalar var.

Rəşad Əliyev də elə bu məsələyə toxunaraq, Neharada.az-ın özəlliklərindən, təqdim etdiyi yeniliklərdən danışıb:

“Mobil tətbiq əlavə xidmətə görə saytdan fərqlənir. Həmçinin mobil tətbiq artıq daha rahatdır. Platformaya hər kəs özü məkan və ya xidmət əlavə edə bilər. Bunun üçün “Əlavə et” funksiyasından faydalanmaq olar. “Yaxınımda” bölməsi üzərindən isə Sizə yaxın məkanları tapa və oraya gedə bilərsiniz. Həm sayt həm də mobil tətbiqdə məkanlarda keçirilən tədbirləri də əlavə etmək mümkündür”.

Öyrənirik ki, məkanlar Google Map xəritəsi üzərinə yerləşdirilir.

Məkanları platformaya yerləşdirmək ödənişli və ödənişsiz olaraq 2 kateqoriyaya bölünüb:

“Neharada.az-a ödənişli məkan əlavə etmək üçün aylıq 10 dollar ödəniş etmək lazımdır. Ödənişsiz olaraq isə məkan yüklədikdə bu, platformada 60 gün ərzində aktiv olur. Ödənişsiz versiya istifadəçilərin xidmətimizi sınaqdan keçirməsi üçün nəzərdə tutulub.”.

Onun sözlərinə görə, layihənin bazara gətirdiyi əsas yenilik QR kod istehsal edərək, istifadəçilərə güzəştlər qazandırmasıdır:

“Platformada olan xidmət sahələrindən istifadə edib, bunu hər hansı bir digər yaxınınız ilə paylaşırsınızsa, bu paylaşıma görə Sizə QR kod verilir. Məsələn, hər hansı bir kafedəsiniz və platforma vasitəsilə həmin məkanı sosial şəbəkədə öz səhifənizdə və ya bir dostunuz ilə bölüşürsünüz. Bu paylaşıma görə kafedə müəyyən olunmuş güzəşti əldə edirsiniz. İş prinsipi belədir: Siz paylaşım edəndə sistem sizə bir QR kod təqdim edir və bu 20 dəqiqə içərisində aktiv olur. QR kodu hesab ödənişi zamanı təqdim edirsiniz və kassada skan olunub sizə güzəşt verilir. Bir QR kod ilə bir güzəşt əldə etmək mümkündür. Bir xidmət üzrə bir gün ərzində bir adam ən çox 3 dəfə güzəşt əldə edə bilir. İstifadə olunmuş və ya vaxtı keçmiş QR kodla kassaya yaxınlaşıb, güzəşt istəsəniz, bu, mümkün olmayacaq. Çünki yalnız bir paylaşıma görə bir güzəşt edilir”.

R. Əliyev deyir ki, Azərbaycan bazarında bu mexanizmlə işləyən alternativ layihə yoxdur.

Digər bir yenilik isə “Feedback” (Şərhlər) bölmüdür:

“Avropa və Asiya ölkələrində buna oxşar layihələr var ki, onlar restoranlar üçün Feedback sahəsi üzrə ixtisaslaşıb. Belə ki, insanlar rəylərə, reytinqə görə məkanları tərcih edir. Məsələn, axşam yeməyə getmək  istəyirsiniz, seçmək istədiyiniz məkanın kriteriyalarına  platformadakı rəylərdən baxırsınız. Bu, ciddi məsələdir. Ramazan bayramında restoranlarda sıxılıq zamanı bazarda bununla bağlı o boşluğu müşahidə etdim. Restorana gedib yer seçmək istəyirsən, amma rezervasiyan yoxdursa, bu, mümkün deyil. Yer tapa bilmirsən. Biz platformada bu problemə də son qoymağı hədəfləyirik. Zaman keçdikcə resursda “Rəylər” bölümü daha da inkişaf etdiriləcək”.

Layihə rəhbəri qeyd edib ki, hazırda  tətbiqdə 1000-dən çox məkan aktivdir və bu say daha da artacaq.

Onun sözlərinə görə, layihəyə rəğbət hər gün artır:

“Amerika olanda müşahidə etdim ki, orada  QR kodlardan istifadə əhali arasında çox populyardır. Azərbayacanda isə bu sahə hələ tam geniş yayılmayıb deyə bu istiqamətdə daha çox işlər görüb, insanların diqqətini cəlb etməyi düşünürük”.

Qeyd edək ki, platformada məkanlar sırasına alış-veriş, əyləncə, turizm, idman, tibb mərkəzlərini, kafe, restoranları, şadlıq saraylarını, otelləri, mağazaları, təhsil ocaqlarını, dövlət orqanlarını, bankları, muzey və kinoteatrları və s. kimi yerlər əlavə edilib.  Bu imkandan isə dünyanın istənilən yerindən faydalanmaq olar.

Hələlik yalnız Azərbaycan dilində olan platforma gələcəkdə digər dillərdə də təqdim ediləcək.

Platforma ilk olaraq Android telefonlar üçün nəzərdə tutulub. Tətbiqi buradan yükləyə bilərsiniz.

Məltəm Talıbzadə